Mundakan, Busturian eta Gernikan aparkatutako 28 autoren suteen ustezko egilea atxilotu dute

Gizon bat atxilotu du Ertzaintzak, Mundakan, Busturian eta Gernikan hainbat autori su ematea egotzita. Iazko udan hasi eta urrira arte sortu dira suteak, 28 auto kaltetuz.

Ertzaintzak 38 urteko gizonezko bat atxilotu du Mundakan, Busturian eta Gernikan, 2022ko udatik urrira bitartean, aire zabaleko aparkalekuetan 28 ibilgailuri su ematea egotzita. Ikerketek atxilotua suteekin lotzen dute, eta ondorioz, 28 autori sortutako kalteekin.

Lakuako Segurtasun Sailak jakitera eman duenez, ikerketetan, aipatutako hiru herrietan izandako hainbat sute ikertu dira. Ikerketa abuztuan hasi zuten, eta iazko urrian indartu zen, Goitiz bidean eta Basamortu kaleko aparkalekuan aparkatuta zeuden ibilgailuek su hartu zutelako, 2022ko abuztuaren 9an eta 14an, hurrenez hurren. Bi sute horietan, 21 auto kaltetu ziren erabat edo partzialki.

Bestalde, urriaren amaieran, Gernikan, gauez hainbat ibilgailuri eragin zien beste sute bat ikertu zuten. Autokarabana batean lo zegoen pertsona bati sutearen berri eman zion herritar batek, eta ihes egin behar izan zuen, kalte pertsonalik ez izateko. Sutearen ondorioz, autokarabana kiskali egin zen.

Ikerketaren baitan, Mundaka, Busturia eta Gernika inguruko beste sute isolatu batzuk ere aztertu ziren. Sua, oro har, ibilgailu batean hasten zen, eta, batzuetan, beste auto batzuetara zabaltzen zen, hurbiltasunagatik. Ertzaintza Mundakako eta Gernikako udaltzainekin koordinatu da. Atxilotuari kalte delitua egotzi diote.