Irakasle postuen murrizketak salatzeko protestak Zuberoan
Urdiñarbe eta Muskildin kezka eta haserrea sumatzen da heldu den sartzerako bi eskoletako postu erdi bana murriztea aurreikusten baita. Ondorioz euskara postu erdia eta frantses postu erdia galtzeko zorian direla salatzeko blokeoa burutu dute gurasoek, irakasleek eta hautetsiek.
Urdiñarbe eta Muskildiko bi eskoletan irakasle postuen murrizketak aurreikusten direla heldu den ikasturtean salatzeko blokeo ekintza burutu dute gaur astelehenean.
Ikas Bi sare publikoko gurasoen elkarteak bultzaturiko protesta ekimen horren bidez haien kezka eta haserrea agerian jarri dute bertan bildutako irakasle, guraso eta hautetsiek bi eskoletako postu erdi bana murriztea aurreikusten duelako Bordeleko Hezkuntza Akademiak.
Ama eskola eta lehen mailako ikasleen gurasoen elkarteak salatu duenez, frantses postu erdi bat eta euskarazko beste postu erdi bat desagertuko lirateke heldu den irailatik aitzin, nahiz eta haur gehiago matrikulatu diren aipaturiko ikastetxe publikoetan.
Aurten 45 ikasle daude eta 2023-2024 ikasturte hasieran 56 izanen dira.
Haien ikastetxe eta herrientzat ezinbesteko diren baliabideak galdetzeko beldur blokeo bat egitea erabaki dute, gaur goizean, Ikas-Bi sarean diren gurasoek modu horretan joan zen otsailaren 11an egin zuten mobilizazioari segida izanen da.
Egun hartan 250 lagun atera ziren karrikara Urdiñarben, bi herrietako hautetsiek deiturik. Gaurko mobilizazioa jendetsua izan da baitaere. 200dik gora lagun bertaratu dira, haien artean eskualdeko herrietako auzapezak baita Iñaki Echaniz Nupes aliantzako diputatua ere.
Mobilizazioa Urdiñarben: burasoak, irakasleak eta hautetsiak elkartu dira goiz huntan, Urdiñarbe eta Muskildiko eskoletan bi postu erdi kenduko dizkietela salatzeko https://t.co/3W71zUas6B pic.twitter.com/k96GK45Huy
— kazeta.eus (@kazetaeus) February 20, 2023
Irakasle postuen defentsak kanpaina martxan jarri duen elkarteak deia luzatu du «suminduak» diren herritar eta hautetsi oro mobilizazioekin bat egin dezaten. Era berean murrizketak salatzeko sinadurak biltzeko kanpaina abian delka oroitarazi dute.
Gurasoek azaldu dutenez protesta dinamika honen helburua litzateke «pisu bat ukaitea gure eskolen salbatzeko eta haurrek ukan dezaten kalitatezko hezkuntza bat gure herri ttipietan».
Ondoko egunetan mobilizazioak aregotzeko aukera bada, François Xavier Pestel Hezkuntza Akademiako zerbitzu buruak martxoaren 9rako lanpostuen bilakaerari buruz behin behineko erabakia hartu behar duelako.
Anartean, hitzordu berria eman dute heldu den hilaren 27rako.