Hamaika kilometroko lasterketa, mugaz gaindi, pertsona migranteen eskubideen alde
Mugaz gaindiko eta Lurralde arteko Lankidetzarako elkarteak (ACTI) ‘Mugarik Gabeko Korrika’ lasterketa antolatuko du aurten lehen aldiz. Martxoaren 12an, igandearekin, Hendaian hasi, Urruña eta Irundik pasa eta ostera irteera lekuan bukatuko da hamaika kilometroko ibilbidea.
Baionako unibertsitateko sei ikaslek migratzaileen eskubideen alde lanean ari diren elkarteak laguntzeko lasterketa antolatu dute martxoaren 12an.
Urtero mugaz gaindiko gaiak lantzen dituen Mugaz gaindiko eta Lurralde arteko Lankidetzarako’ elkarteak (ACTI) ‘Mugarik Gabeko Korrika’ lasterketa antolatu du aurten.
Martxoaren 12an, igandearekin, Hendaian hasi, Urruña eta Irundik pasa eta ostera irteera lekuan bukatuko da hamaika kilometroko ibilbidea.
Masterreko bigarren urtean diren sei ikasleek «mugen itxierari garrantzia emateko hautua egin» dute, Florence Messoah proiektu buruak Kazeta.eus atarian adierazi duenez.
«Konturatu gira mugen heste horrek eragina zuela tokiko biztanleengan, baina baita migrazio bide hori hartzen duten migratzaileengan ere» zehaztu du ikasleak.
Diakite eta Bidasoa Etorkinekin eta Elkartasuna Larrun' elkarteen laguntza jaso dute proiektuan zehar eta horretarako, migratzaileen eskubideen alde lanean ari diren elkarteak sostengatzea erabaki dute sei gazteek, jasotako dirua banatuz.
Izan ere, lau helburu zehatz azpimarratu ditu Florence Messoah gazteak: «Mugen heste horren eragozpenak azaleratzea, migranteak laguntzen dituzten bertako elkarteak eta haien lana ezagutaraztea eta, bide beretik, izen-emateekin bildutako dirua elkarteei ematea». Horretaz gain, Txingudiko badia eremua sustatu nahi dute.
Ibilbide zirkularra
Ekimenaren xehetasunetara joz, Hendaiako Gaztelu Zahar pilotalekutik abiatuko da lasterketa.
Pausu eta Behobia arteko zubia pasa eta, Irunen Bidasoa ibaiaren ertzean segituko dute parte-hartzaileek. Lapurdira Santiago zubitik sartuko dira berriz.
Helmuga Gaztelu Zahar pilotalekua izanen da, ibilbide zirkular bat eskainiz. Kirolarientzat bi aukera daude: «Oinez ala korrika parte hartzen ahalko da» azaldu du proiektuburuak.
Izen-emateak aitzinetik egin behar dira webgune honetan. Oinez egin nahi dutenentzat, parte-hartzea bost eurokoa da eta hitzordua 09.30ean.
Korrikalariek, berriz, hamar euro ordaindu beharko dituzte eta 10.30ean abiatuko dira. Azken lasterkaria abiatuko denean, oren bat eta erdi izanen dituzte parte-hartzaileek ibilbidea bukatzeko. Ibilbide xehea ezagutzeko klikatu hemen.
Horretaz gain, lasterketa garaian MNA64 elkartea abiatze puntuan izanen da stand batean, kirolariak ez direnei mezua pasarazteko.
Ekimena bultzatu duten gazteak laguntzaileen bila dira lasterketaren antolaketa lanetan murgiltzeko.