Istiluen aurrean, ordena eta gazteei «autoritate gehiago» ezartzea proposatu du Macronek
Azken hilabeteko istiluen aurrean, Emmanuel Macron frantziar presidenteak ikasgai argia atera duela adierazi du: «Gazteentzat ordena eta autoritate gehiago bermatu behar du Gobernuak». Positibotzat jo du istiluak baretzeko 45.000 polizia bidali izana.
Emmanuel Macron frantziar Gobernuko presidenteak astelehen honetan adierazi duenez, duela hilabete baino gutxiago herrialdea astindu zuten istiluetatik hainbat ikasgai atera ditu. Nagusienak «ordena behar dela eta gazteei autoritate gehiago ezarri behar zaiela» esan du.
«Nire lehen ikasgaia ordena, ordena eta ordena da. Bigarrena da gure herrialdeak autoritatearen itzulera bat behar duela maila bakoitzean, eta lehenik eta behin familietan», azpimarratu du Macronek astelehen honetan telebistan egindako elkarrizketa batean. Elkarrizketaren hasierako helburua Gobernuaren 100.eguneko jardueraren balantzea egitea zen, apirilaren erdialdean dekretu bidez pentsioen erreforma onartu izanak markatuta.
Kaledonia Berrian egindako telebista elkarrizketan esan du «kalifikaezinak» iruditu zitzaizkiola ekainaren 27an kontrol batetik ihes egiten saiatu zen 17 urteko adingabe bat tiro batez hil ondoren astebetez iraun zuten istiluak
Azpimarratu duenez, ordutik «ordenara itzultzea nagusitu da», eta hori «inoiz ez bezalako hedapenari» esker egin dela adierazi du, segurtasun indarretako 45.000 agenterekin. Gaineratu du polizia horiei esker «lau egunetan» amaitu zirela istiluak, eta 2005ean izandako istiluetan hiru aste behar izan zirela gogoratu du.
Nabarmendu du, halaber, polizia operazio horrek, 4.000 atxilotu baino gehiagorekin, «erantzun judizial gupidagabea» izan zuela, ehunka atxilotu bidali zituztela auzitegietara eta «erabaki judizial oso azkarrak» hartu zituztela.
Gazteengana heltzeko, familiak abiapuntu
Macronek aipatu du istiluen eragileen artean «gazte asko» egon zirela, atxilotuen artean batez besteko adina 16 urtekoa zela, eta gazte horien ezaugarri komuna dela «familia esparru zaurgarrietatik» eratorritakoak direla; horregatik, bere ustez, erantzunak autoritate handiago baten eskutik etorri behar du, familiatik haratago.
Horregatik iragarri du oporretatik bueltan «gurasoen agintearen» gaia landuko duela, «gazte horiekin dagoen arazoa ezin baitu hezkuntzak konpondu, eta are gutxiago Poliziak». Praktikan, azaldu du «familia batzuk erantzule egitea eta babesik gabe dauden beste batzuei laguntzea» dela helburua, eta, aldi berean, eskolatik, kargu publikoetatik eta segurtasun indarretatik autoritatea inposatzea.
Macronen ustez, «gazteak hobeto babestu behar dira pantailetatik» eta, bestalde, plataformak behartu behar dira edukiak azkarrago kentzera. «Gobernuak martxan jarri ezin dituen neurriak dira», amaitu du.
Udazkenerako agenda
Macronek udatik aurrera Gobernuaren agenda markatuko duten gaietako batzuk ere azaldu ditu, hala nola, trantsizio ekologikorako plan bat, jardueraren «sektoreka» landuko duena, edo immigrazioari buruzko lege aurreratu bat, frantziar Estatura sarrerak kontrolatzea bilatuko duena; azaldu duenez, Gobernuak gehiengo parlamentario bat eraiki nahi du oposizioko beste talde interesdun batzuekin.
Era berean, agindu du aurten frantziar Estatua iaz baino hobeto prestatuta dagoela bero-boladei eta lehorteei aurre egiteko, iaz sute larriak izan baitziren, eta abuztuaren 1etik aurrera frantziarrek izango duten argindarraren igoera defendatu du, Gobernuak energiaren prezioen gorakadaren talka xurgatzeko abian jarritako ezohiko neurriak amaitzean.