Emakumeen genitalen mutilazioak 44.000 heriotza eragiten ditu praktikatzen den herrialdeetan

Birminghameko Unibertsitateak ‘Nature Scientific Reports’ aldizkarian argitaratutako ikerketa baten arabera, emakumeen genitalen mutilazioa heriotza-kausa nagusietako bat da praktikatzen den herrialdeetan, urtero 44.000 emakume eta neskatila baino gehiago hiltzen baitira horren ondorioz.

Emakumeen genitalen mutilazioak legala izaten jarraitzen du gehien praktikatzen den 28 herrialdeetatik bostetan. Lurralde horietan, heriotza gehiago eragiten ditu infekzio enterikoak ez diren beste edozein kausak baino; infekzio horiek kutsatutako elikagaiak edo ura kontsumitzearen, arnas-infekzioen edo malariaren ondoriozkoak izan ohi dira.

Ikertzaileek praktika hori legez kanpo uzteko eskatu dute Malin, Malawin, Txaden, Sierra Leonan eta Liberian, lege-aldaketak aldaketa kulturala ekar dezakeelako. Halaber, praktikatzen den herrialde guztietan desagerrarazteko ahaleginak areagotu behar direla nabarmendu dute.

Birmingham eta Exeter unibertsitateetako ikertzaileek Benin, Burkina Faso, Kamerun, Txad, Boli Kosta, Egipto, Etiopia, Ginea, Kenia, Mali, Niger, Nigeria, Senegal, Sierra Leona eta Tanzanian emakumeen genitalen mutilazioa jasan duten neskatoen kopurua aztertu zuten.

Ikusi zutenez, emakumeen genitalen mutilazioa jasaten duten nesken kopurua %50 hazten baldin bada, bost urtera haien heriotza-tasa ere igo egiten da. Hala, praktikatzen den herrialdeetan urtean 44.320 heriotza gehiago gertatzen direla kalkulatu dute.

«Gure aurkikuntzek erakusten dute emakumeen genitalen mutilazioa dela neska eta emakume gazteen heriotza-kausa nagusietako bat praktikatzen den herrialdeetan, baina aldaketa iraunkor batek emakumeen genitalen mutilazioarekiko jarrera aldatzea eskatzen du komunitate horietan», dio ikerketaren egileetako batek, Birminghamgo Unibertsitateko James Rockey irakasleak.

Hori dela eta, ikertzaileek proposatu dute praktika hori «legez kanpo uztea gauzatzen den herrialdeetan, lege-aldaketak aldaketa kulturala ekar dezakeelako».

Mundu mailan, 200 milioi emakume eta neskatori baino gehiagori egin zaie genitalen mutilazioa. Praktika hori askotan baldintza osasungaitzetan eta gainbegiratze klinikorik gabe gertatzen da, eta horrek min handia, odoljarioa eta infekzioa eragiten ditu.

Jakina da konplikazio obstetrikoak, funtzio sexualaren murrizketa eta osasun fisikoko beste arazo batzuk eragiten dituela epe luzera, baita osasun mentaleko arazoak ere.

OME Osasunaren Mundu Erakundearen kalkuluen arabera, praktika hori pairatu duten neska eta emakumeen tratamendu medikoak 1,4 mila milioi dolarreko gainkostua suposatu zuen 2018an. Hala ere, orain arte, ez da ebidentzia sistematikorik egon praktika horrek haurren hilkortasunaren epidemiologia globalean duen eraginaren inguruan, mutilazioaren dimentsioa neurtzeko zailtasunen isla.

Mutilazio genital femeninoaren funtsezko dimentsio sozial bat da ezkontzan duen eragina; adibidez, praktikak eragina du Afrika mendebaldeko emakumeen ezkontza-aukeretan, kultura eta erakunde patriarkalak direla eta.