Gutxienez 29 pertsona hil dira Istanbulgo etxebizitza batean izandako sute batean
Istanbulen izandako sute baten ondorioz jada 29 dira hildako pertsonak. Etxebizitza eraikin bateko sotoan zegoen diskoteka eraberritzen ari ziren, eta antza bertan sortu da sutea. Zauritutako pertsonak artatzen eta ospitalera eramaten jarraitzen dute osasun langileek.
Gutxienez 29 pertsona hil dira astearte honetan Besiktas auzoko (Istanbul, Turkia) 16 solairuko etxebizitza-eraikin bateko sotoan piztutako sute baten ondorioz.
Hildakoez gain, zauritu batek larri jarraitzen zuen ospitalean, gobernadorearen bulegoak aldizka eguneratutako komunikatuetan emandako balantzearen arabera.
Davut Gul Istanbulgo gobernadoreak zehaztu duenez, sutea eraikineko sotoan piztu da, eraberritzen ari ziren diskoteka bat dagoen lekuan, Anatolia albiste-agentzia turkiarrak jasotako informazioaren arabera.
Sutearen abisua 12.47etan jaso dutela azaldu dute, eta suhiltzaileek orduak behar izan dituztela egoera kontrolatzeko. Hasieran 12 zaurituren berri eman badute ere, pixkanaka larriki zaurituta zeudenak hil egin dira, ospitalizatuta egon arren.
Gertakariaren berri jaso ostean, Turkiako agintariek 31 suhiltzaile-ibilgailu eta ia 90 pertsonako talde bat bidali dituzte gertakariaren lekura. Polizia-agenteak eta osasun-langileak bertan jarraitzen dute.
Hala ere, Gulek azpimarratu du oraindik ez dagoela argi sutea zerk eragin duen, eta suhiltzaileak oraindik lanean ari direla. Gobernadoreak baieztatu du zaurituak izan direla, baina ez du zifrarik zehaztu; batzuk ospitalera eramanak izan dira.
Ali Yerlikaya Barne ministroak bere sare sozialetan argitaratu du gertatutakoa, eta baieztatu du agintariek ikerketa bat jarri dutela abian sugarren jatorria zehazteko.