Michelinek «zigortzen eta arbitrarioki kaleratzen» duela salatu dute sindikatuek Gasteizen
CGT, ELA, ESK eta LABek elkarretaratzea egin dute Michelinek Gasteizen duen lantegiaren sarrera nagusian zuzendaritzak «zigortzen eta arbitrarioki kaleratzen» jarraitzen duela salatzeko, «aurkako epaiak kontutan hartu gabe». Aldarrikatu dute azaroan kaleratutako langile baten buelta.
«Michelinek zigortzen eta arbitrarioki kaleratzen jarraitzen du, aurkako epaiak kontutan hartu gabe». Hala adierazi dute CGT, ELA, ESK eta LABek, astelehen honetan Gasteizen elkarretaratze bat egin duten sindikatuek.
Ohar batean azaldu dutenez, Michelin Gasteizko zuzendaritzak langileei «bere diziplina-araubidea aplikatzen jarraitzen du, neurriz kanpo eta askotan justifikaziorik gabe».
Gogoratu dutenez, «2023an, langileei jarritako zigorren kopurua kezkagarria izan zen, 60 langile baino gehiago zigortu baitzituzten, eta horietatik 15 kaleratu zituztelako». Eta egoerak okerrera egin du udazkenetik, langileek Lantokien arteko Batzordetik irtetea erabaki zutenetik.
Hala, «2024ko lehen hiruhilekoan ere ez dira eten zigorrak eta kaleratzeak», eta, sindikatuen esanetan, zigortutako pertsona gehienek epaitegietan kaleratze bidegabeen aitorpena lortu dute, «edo Michelin berak onartzen du aldez aurreko akordio baten bidez, kaleratze horien oinarrian egon ohi den argudio lausoaren ondorioz».
Baina langile askok ez dute helegiterik aurkezten, «jakin baitakite errepresaliak egon daitezkeela gero eta autoritarioagoa den zuzendaritza bati aurre eginez gero».
Ruben Calvoren kaleratzea
Ruben Calvoren kasua da horren adibide. Azaroaren 2an kaleratu zuten, «urriaren 20an beste lankide kaleratu baten epaiketara lekukotza ematera joan ondoren». Sergio Mauleon zuen izena langileak, eta kaleratzea bidegabea izan zela ezarri zuen epaileak.
«Kaleratze-gutunean, beste kasu askotan bezala, gezurrez beteta eta desitxuratuta dauden gertakari batzuk azaltzen dira. Egitate horiek, gainera, epaiketa baino hilabete lehenagokoak dira, eta, gure ustez, epaiketara lekukotza ematera joan izan ez balitz, ez liratekeen inoiz beraren aurka manipulatuko», diote sindikatuek eta Calvoren buelta exijitu dute.