Eragile independentistek «kaleetara itzultzeko» deia egin dute Diadan bost mobilizazio eginez
Irailaren 11ko Diadaren egunerako mobilizazio deialdiak egin dituzte Kataluniako eragile independentistek; bost hiritan aldi berean egingo dituzte mobilizazioak. «Independentzia nahi dugu, Espainiaren mendekotasuna eskubide eta askatasunen arazoa ez ezik, biziraupen kolektiboaren arazoa badelako».
Herrialde Katalanetako erakunde independentistek «kaleetara itzultzeko» deia egin diete kataluniarrei irailaren 11n, Diadan, eta bost hiritan aldi berean egingo diren mobilizazioetan parte hartzeko deia egin dute: Bartzelonan, Gironan, Tarragonan, Lleidan eta Tortosan.
Lluis Llach ANCko presidenteak prentsaurrekoa eman du Bartzelonan ostegun honetan, eta katalanek espainiar Estatuko kide izateagatik ordaintzen duten «prezioa jasanezina» dela salatu du. «Independentzia nahi dugu, Espainiako metropoliaren mendekotasunaren ondorioak eskubide eta askatasunen arazoa ez ezik, biziraupen kolektiboaren arazoa ere badelako», adierazi du Llachek.
ANC-k irailaren 11ko mobilizazioak antolatzen ditu 2012tik, normalean beste erakunde batzuen laguntzarekin. 2024koan, ANC, Omnium Cultural, Asociació de Municipis per la Independencia (AMI), Consell de la República, Intersindical eta Ciemen erakundeak izan dira antolatzailekideak.
Erakunde horiek sinatutako manifestuaren arabera, «independentismoa da politikoki eta sozialki bidezkoagoa den herrialde baterako etorkizuneko proiektu bakarra». Gaineratu dute, «etorkizun hobea, Kataluniako errepublika duinagoa, bidezkoagoa eta berdeagoa eraikitzeko berme bakarra» dela.
Deitzaileek adierazi dutenez, «ez dago justiziarik, ez herrialderik, ezta etorkizun duinik ere» independentziarik gabe: «Espainiako Erresumaren menpe egotea egiturazko mehatxua da hizkuntza eta kultura katalanaren biziraupenerako eta Kataluniaren etorkizun ekonomikorako».
«Egiturazko mehatxuak»
Testuak azpimarratzen duenez, «kaleetan mobilizazio masibo eta etengabea ezinbesteko baldintza da, baina ez bakarra, alderdi independentistei presioa egiteko eta Espainiako Estatuarekin beste eraso bat eragiteko». Llachez gain, Xavier Antich Omnium Culturaleko presidenteak ere hartu du hitza. Deitzaileek osatutako «fronte komuna» txalotu du, eta adierazi du horrek erakusten duela mugimendu independentista «indartsua, zeharkakoa, adimentsua eta estrategikoki heldua» dela.
Gizarte desberdintasunei aurre egiteko beharra ere azpimarratu du, «aniztasunean bat eginda egon behar dugula da gure indarra», ebatzi du.
Ekitaldi horretan, Jordi Gaseni AMIko presidenteak, Ester Rocabayera Intersindikaleko idazkari nazionalak, Teresa Vallverdú Errepublikako Kontseiluko kideak eta David Minoves Ciemeneko presidenteak ere hartu dute hitza. Llachek ez die kazetarien galderei erantzun beste gai batzuen inguruan, besteak beste, Salvador Illa sozialistaren inbestidurarako PSCren eta ERCren arteko negoziazioek markatutako egungo testuinguru politikoari buruz duen iritzia.