Gizon bat atxilotu dute, Donostiako lur azpiko parking batean sexu erasoa egiteagatik

Sexu erasoa gertatu da azken gau honetan Donostiako Easo Plazako aparkalekuan. Gizon bat atxilotu dute eta ostiral honetarako protesta egiteko elkarretaratzea deitu dute.

Donostiako Udaltzaingoak gizon bat atxilotu du Gipuzkoako hiriburuko aparkaleku batean emakume bati sexu erasoa egiteagatik, Donostiako Udalak jakitera eman duenez.

Biktimaren testigantzaren arabera, gizona emakumearengana hurbildu zen goizaldean, Easo plazako aparkalekuan, eta sexu erasoa egin zion. Ondoren, ihes egin zuen.

Biktimak laguntza eskatu zion inguruan zegoen Udaltzaingoaren patruila bati. Emakumea artatu eta ospitalera eraman zuten.

Emakumeak emandako datuei esker, udaltzainek ustezko erasotzailea identifikatu dute eta ostegun honetako 11.00ak aldera atxilotu dute, bere etxean.

Biktimak salaketa jarri du, eta erasoaren ustezko egilea Ertzain-etxean dago ostegun honen eguerdian.

Udalak, adierazpen instituzional batean, gertaera horien «gaitzespen irmoa» adierazi du, eta «biktimari babesa eta elkartasuna» adierazi dizkio, eska diezazkiokeen udal zerbitzuak eskainiz.

«Horrelako erasoak gure gizartean oraindik nagusi diren indarkeria matxistaren eta genero-desberdintasuneko jarreren adierazpenik nazkagarriena dira, eta Udalak gaitzetsi egiten ditu», dio adierazpenak.

Udalak «hiriko eragile sozial, feminista eta giza eskubideen aldeko eragileekin batera, balioetan heztearen eta gizonen eta emakumeen arteko berdintasunaren alde lan egiten jarraitzearen» alde egin du.

Gauzak honela, elkarretaratzea deitu du ostiral honetarako, sexu erasoa gaitzesteko.