Abisu horia euskal kostaldean asteazken eta ostegunean, 5 metrotik gorako marea biziengatik

Lakuako Gobernuko Larrialdiei Aurre Egiteko eta Meteorologiako Zuzendaritzak abisu horia aktibatu du asteazken eta ostegunerako, euskal kostaldean itsas arriskuagatik. Izan ere, 5 metrotik gorako marea biziak eta metro bateko olatuak espero dira. Segurtasun neurriak garatu dituzte zenbait herritan.

Itsas arriskuagatik ezarritako abisu horia indarrean egongo da asteazken honetan 17.00etatik 19.00etara. Itsasaldia oso bizia izango da, beraz, itsasgoraren inguruan baliteke itsasoak denbora tarte laburrean itsasertza gainditzea itsasaldiek bereziki eragiten duten lekuetan, olatuen altuera edozein dela era. Itsasgora 17.41ean izango da, 5,02 metroko estimatutako marearen altuerarekin. Olatuen altuera adierazgarria metro bete ingurukoa izango da, eta olatuen arteko periodoa 6-9 segundokoa.

Ostegunean abisu horia aktibatuko da berriro, 17.00etatik 20.00etara. Itsasgora 18.23ean izango da, 5,12 metroko estimatutako marearen altuerarekin. Olatuen altuera adierazgarria metro bete ingurukoa izango da, eta olatuen arteko periodoa 10 segundokoa.

Bilboko Udalak arreta eskatu du Itsasadarraren inguruan

Bilboko Udalak arreta eskatu die itsasadarraren inguruan dauden herritarrei datozen hiru egunetan marea biziengatik. Fenomeno horrek, presio atmosferiko baxuarekin eta haizearen indarrarekin eta norabidearekin batera, itsasadarrak gainezka egitea ekar lezake zona jakin batzuetan itsasgorarik garaienetan.

Udalak prebentziozko kontingentea aurreikusi du. Horrela, lur-zakuak jarriko dira Elorrietako bihurgunean, Deustuibarran, Zorrotzaurren eta Olabegan. Gainera, saneamenduko kamioi bat mobilizatuko da, behar izanez gero laguntzek.

Pasaiako Udalak etxebizitzak eta lokalak babestea gomendatu du

Pasaiako Udalak ohartarazi duenez, itsasgorak irauten duen bitartean «litekeena da urak itsasertza gainditzea denbora batez», horregatik, herritarrei eskatu die euren etxebizitzak eta lokalak babesteko eta itsasora ez hurbiltzeko.

Halaber, kostaldetik gertu dauden errepideetan edo itsasoak kostaldea gaindituko duela aurreikusten den lekuetan ibilgailurik ez erabiltzeko eskatu du. Halaber, hondoko itsasoak kaltetutako eremuetan kirol- eta nautika-jarduerarik ez egitea eta itsasontziak leku babestuetan maitatzea gomendatu du.

Orion herritarrei zuzendutako mezua zabaldu du Udalak, olatuak «ohi baino handiagoak izango direla» ohartaraziz, asteazkenetik ostiralera kasu honetan. «Adi ibili eta, ahal duzuen heinean, neurriak hartu», dio Anuska Esnal alkateak sinatutako mezuak.

Herri honetan asteazkeneko itsasgora 17.29tan gertatuko da; ostegunean, 18.11tan; eta ostiralean, 18.52tan. Goizekoak 5ak eta 6.30ak artean aurreikusi dituzte.