EH Bilduk, EAJ-k eta PSE-k Osakidetzako LEPen eredua berrikusteko akordioa lortu dute
EH Bilduk EAJ eta PSErekin erdietsitako akordioa bihar, osteguna, bozkatuko da Legebiltzarrean. «Lan Eskaintza Publikoak finkatzeko prozesuak amaitzeko eta, oposizio prozesu horiek azkar ebazte aldera, kudeaketa hobetzeko neurrietan sakontzeko» eskatzen zaio Lakuari.
EH Bilduk eta Lakuako Gobernua sostengatzen duten taldeek, EAJ-k eta PSE-k, akordioa lortu dute Osakidetzako LEPen eredua «berrikusteko» eta egungoen finkapena amaitzeko. Akordioa bihar bozkatuko da Legebiltzarrean, Osoko Bilkuran.
Koalizioak ohar baten bidez jakinarazi duenez, aurkeztutako legez besteko proposamen bati jarraituz, pertsonal arloko politika eraldatzeko akordioa itxi dute. Hiru talde sinatzaileek erdietsitako akordioa bihar, osteguna, bozkatuko da Legebiltzarrean.
Adostutako erdibidekoan Osasun sailari eskatzen zaio egungo «Lan Eskaintza Publikoak finkatzeko prozesuak amaitzeko eta, oposizio prozesu horiek azkar ebazte aldera, kudeaketa hobetzeko neurrietan sakontzeko».
Era berean, EH Bilduk, EAJk eta PSEk mahai sektorialean Osakidetzako langileei egonkortasun handiagoa emango dieten formulak jorratzeko eta Lan Eskaintza Publikoen deialdien egungo eredua berrikusteko eskatzen diote Osasun sailari.
Osakidetzako ESI bakoitzean dauden asistentzia premiak eta beharrezko estalduren balorazioa egitea da gobernukideen eta EH Bilduren artean adostutako beste puntu bat. Ildo horretan, eskatzen da ESI bakoitzeko plantilla antolatzea zentro bakoitzaren errealitatea aintzat hartuta, eta hori ordezkaritza organoekin lankidetzan egitea, koalizioak gaineratu duenez.
Otxandiano: «Aurreko gobernuari zuzenketa osoa da»
Pello Otxandiano EH Bilduren Legebiltzarreko bozeramaileak adierazi duenez, adostutako ekimena «albiste ona» da, eta erakusten du EH Bilduk jarrera «erabat konstruktiboa» izango duela eta «jendearen arazoak konpontzeko» behar diren politikak planteatzen saiatuko dela.
Radio Euskadin egindako adierazpenetan, Otxandianok esan du Osakidetzari buruzko itun hori, Torres sailburuak lanbide arteko gutxieneko soldata propioari buruz egindako iragarpena, etxebizitza politikan eta «baita garraio politikan ere, duela bi urte EH Bilduk planteatutako eta EAJ-PSEk atzera botatako neurriak planteatuz», «aurreko gobernuari zuzenketa oso garrantzitsua» direla.