Sinesgabetasuna, egonezina, haserrea, amorrua... Atzoko goiza aurrera zihoan heinean, BSHko zuzendaritzak iragarritakoaren aurrean gure animo-egoera aldatuz zihoan: inolako arrazoi objektiborik gabe, zuzendaritzaren borondate hutsagatik, Esquírozko lantegia desmuntatuko zutela jakinarazi ziguten, produkzioa taldeko beste lantegi batzuetara eramateko.

Kapitalismoaren irrika gupidagabea gizonezko beltzez jantzita agertu da, zoritxarreko iragarpenak ekarriz: urteetan zehar bere balioa eta ongi egitea erakutsi duten lantegiko langileak, orain, lehiakorrak ez direla diote. Taldeak diru gehiago irabazten duen beste lantegi batzuk daudela. Edo hori diote beltzez jantzitako gizon horiek. Eta piezak hobeto banatuta, diru gehiago irabaziko dutela esaten dute.

Iragarpen eta asmo horietatik oso urrun geratzen da BSHren erantzukizun sozial korporatiboa, eta baita Nafarroako gizartearekiko eta, lehenik eta behin, bere langileekiko konpromisoa ere. Hitz hutsak besterik ez dira, eta miseriarik handienaren aurrean erortzen dira: Judas-en hogeita hamar txanpon.655 pertsonaren etorkizunaren truke, 655 bizitzaren truke. Eta baita haien inguruan dauden beste hainbatena ere.

Izugarri mingarria da horrelako ikuskizunetan parte hartzea, non beti garen berdinak sarrera ordaintzen dugunak: gure zergekin eta kotizazioekin BSHk baliatu dituen ERTEak ordaindu ditugu; gure izerdiarekin lau egun doan lan egin dugu urtean, lantegiaren lehiakortasunaren izenean. Eta, argi dago, inolako ordainik gabe.

Kapitalismoaren irrika gupidagabea. Horri aurre egiteko modurik bakarra zuen indar, energia eta erabakia dira, BSH Esquírozko langileok egunez egun erakusten dituzuenak, zuen lanpostuetan, errendimendu betean lanean. Egin dezagun bat gure indarrak, baita Nafarroako ehunka mila langilerenak ere, argi eta irmoki horrelako jardunbideekin, eta errotzearekin zein ongizatearekin zerikusirik ez duten erabakiekin ados ez gaudenok.

Beraz, bakoitzak bere esparruan pilak jar ditzagun, oraingo erabaki hau, deslokalizazio baten kronika iragarri moduan transmititu digutena, atzera botatzeko.

Guri dagokigunez, beti egon garen tokian izango gaituzte: elkartasunez eta borroka gogoz gure lankideen alboan.