2021 EKA. 11 - 16:55h ‘Zerua eta Gaua’, bi abestiz osatutako Gariren erreferentzia berria Gari Hertzainak taldearen abeslari izandakoaren lan berria da ‘Zerua eta Gaua’ eta bi abestik baino ez dute osatzen. Bi singleak argitaratzeaz gain, ‘Zerua’ abestiaren bideoklipa ere aurkeztu du, eta jakinarazi duenez, oraingoz ez da disko berririk izango. NAIZ Gari (Hertzainak) abeslariak ‘Zerua eta Gaua’ lana aurkeztu du, pop-rockaren eta bere alderik intimistenaren artean mugitzen diren bi abestiz osatutako lan laburra. Oraingoan, Borja Barrueta (Jorge Drexler, Carmen Paris), Aitor Etxebarria teklatujolea eta bere zuzenekoetan parte hartzen duten musikariak izan ditu alboan. ‘Zerua’ Unai Mimenza ingeniariaren eta Jon Agirrezabalaga (We Are Standard) ekoizlearen eskutik gauzatu da Tio Pete estudioetan. Abestiaren letra Garik eta Juan Luis Zabala idazleak osatu dute. Bi single berri hauek, oraingoz disko berri batekin batera etorriko ez direnak, Garik azken urteetan hasitako bidean sakontzeko balioko dute, non elementu elektronikoak, sintetizadoreak kasu, espektro zabalago bat hartzen ari diren, baina betiere perkusioaren eta gitarren tonu beroa eta Gariren ahots ia xuxurlaria errespetatuz. Gainera, ‘Zerua’ kantaren bideoklipa ere aurkeztu dute, Aitor Oñederrak zuzendua eta Xanti Agirrezabala eta Itxaso Sanchez aktoreek parte hartuta. ‘Zerua eta Gaua’ da Garik ‘Beste denbora batean’ diska argitaratu zuenetik 2018an bakarkako lehen lana. Gainera, 2019an, Garik eta Josu Zabalak Bilboko Kafe Antzokian eman zuten kontzertua diskora eraman zuten.