Txikiak ginenean, eskolan, institutuan eta abarren, irakasleek beti esaten ziguten, pertsona bakoitza izaki bakarra zela unibertso osoan, eta, horregatik, bere balioa ere mugagabea zela, hau da, infinitua. Gaur egun, ordea, ikusitakoak ikusita, nekez sinis liteke hori. Alde batetik, badaude pertsona batzuk, zaintzen dituztenak Jainkoa berbera baino gehiago balira bezala, alegia, armaz, poliziaz, gotorlekuz eta abarrez, beste batzuk, ordea, mespretxatzen dituztenak zaborra eta arratoiak baino gehiago, legenarra edo beste gaitz kutsagarri gaiztoren bat balute bezala. 

Lehendabizikoen artean lasai-lasai egon litezke Donald Trump, Benjamin Netanyahu, Vladimir Putin, Javier Milei, Elon Musk eta bat eta beste. Bigarren taldean, aldiz, munduko gehienak egon gintezke, baina, batez ere, pertsona behartsuak, arrazializatuak, zaurgarriak, migratzaileak, txiroak eta abar. 

Lehendabizikoen arteko belarri batek balio lezake besteen bizi osoa baino askoz ere gehiago, gogora dezagun, esate baterako, Donald Trumpen atentatua: bere biziak balio gorena omen zeukan, baina atentatu egilearenak, ordea, hutsaren hurrengoa; poliziek, ahal badute, halako pertsonak, lekuan bertan hiltzen dituzte, epaitu eta deus ere egin gabe, gehienetan, gainera, tratu txar ugari eman eta gero. 

Hortaz, nik uste dut, gaur egun, gero eta argiago gelditzen ari dela, mundu honetako pertsonen balioa, zoritxarrez, gero eta gehiago baloratzen ari dela, pertsona horiek dituzten sosak, botereak, ahalmen politikoak, armak eta abar, eta abar, eta ez daukaten jakintza, humanismo, kultura edo antzeko beste balio batzuengatik. Egoera nahiko etsigarria da, baina, hala eta guztiz ere, badakigu jarraitu beharko dugula lanean, egoera horren aurka egiteko. 

Zuen iritzi artikulu edo gutuna iritzia@gara.net helbidera bidal dezakezue, word formatuan edo beste formatu editagarri batean. Idatzian sinatzailearen izena, abizenak, telefonoa eta NAN zenbakia agertu behar dira. Iritzi artikuluak eta gutunak sinatzailearen izen-abizenekin argitaratuko dira. Egileak talde baten izenean sinatzen badu, sinatzailearen izenaren azpian taldearen izena agertuko da. NAIZ ez da iritzia sailean argitaratutako edukiez arduratzen.