Tallarinak ganboiekin

LEHENENGO ERA
Osagaiak 4 lagunentzat
300 g tallarin, 700 g ganboi, 3 baratxuri ale, perrexila, olioa.

Zailtasuna                        2             

1. Ganboei burua eta azala kendu. Zartagin batean buruak olio pixka batekin arin erregosi. Atera eta buruak zapaldu, duten salda guztia kenduz.
2. Kazola batean ur ugari, gatza  eta buruak 10 minutuz egosi.
3. Salda xukatu eta irakiten jarri. Ura irakiteko moduan dagoenean, tallarinak sartu; noizean behin eragin.
4. Samur baina oraindik samar gogor daudenean –al dente eran– atera eta xukatu. Ez busti ur hotzean.
Aldi berean honako hauek prestatu:
1. Txikitutako baratxuriak olio zurrusta  batekin erregosi.
2. Zatitutako ganboiak gehitu eta arin erregosi. Txikitutako perrexila eta buruen salda gehitu.
Plateretan tallarinak jarri eta gainean ganboiak.

BIGARREN ERA
Osagaiak 4 lagunentzat
300 g tallarin, 700 g ganboi, 2 piper berde, 150 g kuiatxo, 150 g tomate, olioa.

Zailtasuna                           1

1. Tallarinak egosi eta xukatu.
2. Tiratan moztutako piperrak eta kuiatxoa olio zurrusta batekin erregosi.
3. Dadotan moztutako tomatea eta zatitutako ganboiak gehitu eta arin erregosi.
Plateretan tallarinak jarri eta gainean ganboiak.