Garagardoa hobetzen laguntzeko baliatuko dute adimen artifiziala Belgikan

Belgikako ikertzaile talde batek garagardoaren zaporea hobetzeko erabili du adimen artifiziala, edariaren konposatu kimikoak eta kontsumitzaileen lehentasunak aztertuta. Orain alkoholik gabeko garagardoa hobetu nahi dute.

Etengabe harritzen gaituzte adimen artifizialak eta izan ditzakeen hamaika erabilerek. Oraingoan, Belgikako garagardo jakin bat kontsumitzaileek nola baloratuko duten edota edaria hobetzeko zer konposatu aromatiko gehitu dakizkiokeen aurreikusteko balio duela erakutsi du.

Bezeroek jaki eta edarien zapore berriak gustoko izango ote dituzten ulertu eta aurreikustea zeregin konplexua da, eta konposatu kimikoek zein kanpo faktore ugarik dute zerikusia.

Garagardoak ere berezkoa du kimikaren eta pertsonen nahien arteko orekaren bilaketa, normalean kontsumitzaileekin egindako saiakuntzen bitartez ikertzen dena. Proba horiek, baina, mugak dituzte eta mota desberdinen arteko alderaketaren emaitza partziala izan daiteke. Hortaz, ez dira beti fidagarriak.

Arazo honi konponbidea eman asmoz, Belgikako ikertzaile talde batek 22 mota desberdinetako 250 garagardo komertzialen 200 propietate kimiko baino gehiago bereizi ditu, ‘Nature Communications’ aldizkarian argitaratu berri duten ikerketa batean.

Ehunka konposatu aromatikoen kontzentrazioak neurtzeaz gain, garagardo bakoitza 50 irizpideren arabera ebaluatu du 15 pertsonako talde batek, eta kontsumitzaileen 180.000 iritzi publiko baino gehiagoren datuak bildu dituzte sarean, bost urte iraun duen prozesu batean.

Behin datu-basea lortuta, ikertzaileek ikaskuntza automatikoko ereduak entrenatu dituzte bi aldagaiak konektatzeko: garagardo baten funtsezko aromak eta kontsumitzaileen balorazioa, inork dastatu behar izan gabe.

Emaitza horiek Belgikako garagardo komertzial baten zaporea hobetzeko erabili dituzte, modeloak garagardoaren kalitatea handitzeko aurrez adierazitako aroma jakin batzuk gehituta, eta horrek dezente hobetu ditu balorazioak itsu-itsuan egindako dastatzeetan.

Hala, egileek iradokitzen dute tresna hori lagungarria izan daitekeela kalitatearen kontrolerako eta garagardoen errezeten garapena hobetzeko. Beste elikagai eta edari batzuetan ere erabili daiteke prozedura hau, kontsumitzaileen eskaera espezifikoak modu eraginkorragoan asetzeko.

Emaitzak Belgikako garagardo estilo komertzial nagusietara baino ez dira mugatzen gaur egun, eta baliteke lagin gehiago behar izatea iragarpenak optimizatzeko eta aurkitutako mugak gainditzeko, besteak beste, estilo bakoitzaren efektu espezifikoak eta informazio demografikoa identifikatzeko (adina, kultura…).

Orain helburua alkoholik gabeko garagardo hobea egitea dela adierazi du Lovainako Unibertsitateak.