PaseARTE ibilbidea, Donostian

Abenduaren 1etik aurrera, PaseARTE ibilbidea jarriko da abian Donostiako, hiriko Udaleko Giza Eskubideen atalak antolatuta. Giza eskubideei buruzko hainbat leku eta eskultura erakutsiko ditu: Bretxako plaza, Abuztuaren 31 kalea, Santa Maria basilika, DUAL eskultura, ‘Oroimena-Memoria’ monolitoa...

Donostiako Udaleko Giza Eskubideen atalak hirian giza eskubideei buruzko hainbat leku eta eskultura erakusten dituen PaseARTE ibilbidea antolatu du, Giza Eskubideen Adierazpen Unibertsalaren aldarrikapenaren 75. urteurrena ospatzeko antolatu dituen jardueren artean.

Udalak dioenez, «Donostiak hainbat artelan biltzen ditu, giza eskubideekin zerikusia duten gaiak biltzen dituztenak. Gerra zibila, terrorismoa, emakumearen giza eskubideak eta bakearekin eta askatasunarekin zerikusia duten eskulturak».

Abenduaren 1etik aurrera

Ibilbidea lehen hezkuntzako 5. eta 6. mailako ikasleei zuzenduta dago, abenduaren 1etik aurrera egin ahal izango da, eta 2024ko eskola aldian mantenduko da, astelehenetik ostiralera. Bisitek ordu eta erdiko iraupena izango dute, eta euskaraz zein gaztelaniaz egin ahal izango dira. Oztopo arkitektonikorik gabeko bisita da, eta taldeak 25 pertsona ingurukoak izango dira.

Nola edo hala eskubideen urraketak gogorarazten dituzten lekuak eta lanak sartu dira, urraketen eta horien ondorioen berri emateko gazteenei, hala nola Bretxako plaza, Abuztuaren 31 kalea, Santa Maria basilika, DUAL eskultura, ‘Oroimena-Memoria’ monolitoa, Artzai Onaren katedrala eta Clara Campoamorren eskultura.

Ondoren, modu positiboan idatzitako narrazioa helaraziko zaie ikasleei, erraz uler daitezkeen adibideekin, denboran eta espazioan hurbilak, familian edo eskolan gertatzen direnak eta zuzenean edo zeharka eragiten dietenak. Horrekin batera, balioa emango zaie gizartean bermatzen diren eskubideei.