Alokairu turistikoetan erabiltzen diren kaxak debekatuko dira Florentzian

Florentziako Udalak debekatu egingo du alokairu laburreko apartamentuetara sartzeko ateetan zintzilikatzen diren kutxa metalikoak erabiltzea hiriko gune historiekoetan, «segurtasun eta estetika arrazoiengatik», Sara Funaro alkatesak aurreratu duenez.

Florentziako hirigune historikoko kaleetako ate batzuetan zazpi kutxa metaliko ere ikus daitezke zintzilik. Barruan alokairu laburreko apartamentuetara sartzeko giltzak daude. Hiriko alkatesa Sara Funaroaren arabera, kalte egiten diote hiriko alde zaharraren estetikari, jendetsua eta oso turistikoa delako.

Tokiko hainbat hedabidek jakitera eman dutenez, neurri honek alokatzen diren etxebizitzen segurtasuna hobetzeko ere balioko du.

Neurria, indarrean 2025ean sartuko dena, hamar puntuko plan baten barruan dago, «turismo jasangarria sustatzea, turismo-fluxuetan lan egitea eta egoiliarren bizi-kalitatea hobetzea» helburu duena, Funarok adierazi duenez.

Arau horien artean, nahitaezkoa izango da, halaber, apartamentu turistikoak plaka homologatu batekin identifikatzea, ostatu horiek errekonozitzea eta kontrolatzea ahalbidetzen duten alokairu laburren identifikazio-kode nazionalarekin bat etorriz.

Tuk-tuk eta caddyak, debekatuta

Gainera, caddy edo tuk-tuk motako ibilgailuen sarrera ere mugatuko da Unescok 1982an Gizateriaren Ondare izendatutako hiriko gune historiko batzuetan, baita gida turistikoen bozgorailuen erabilera ere.

Neurriak iragarri dira Italiako hiri honetan G7ko herrialdeen Turismo Gailurra hasi baino egun bat lehenago eta ‘Salba dezagun Florentzia’ batzordearen protesten ondoren. Azken hauek «bertan bizi direnen eta ez aberatsen neurrira egindako hiria» nahi dute. Beraz, espekulazioaren eta alokairu handien aurka borrokatzen ari dira.