Tigrayn dituen osasun-zentroen kontrako erasoak salatu ditu MSFk

Mugarik Gabeko Medikuak (MSF) erakundeak salatu du Tigray eskualdeko (Etiopia) ospitaleak eta osasun-zentroak suntsitu dizkietela, eta zerbitzu medikoen aurka nahita egindako eraso orokorrak gertatzen ari direla. Abenduaren erdialdetik martxoaren hasierara bitartean MSFko taldeek bisitatutako 106 osasun-instalazioetatik ia %70 arpilatuta zeuden eta %30ek baino gehiagok kalteak jasan zituzten; %13k bakarrik funtzionatzen zuten normaltasunez.

MSFk atzo jakinarazi zuenez, Tigrayko instalazio mediko batzuetan lapurretek jarraitzen dute oraindik ere. «Eraso horietako batzuk arpilatze-ekintzatzat har badaitezke ere, kasu gehienetan instalazio medikoek ondo pentsatutako bandalismo ekintzak pairatu dituztela dirudi, funtzionatzen ez uzteko», salatu zuen erakundeak. Osasun-zentro askotan, ekipamendu medikoa suntsituta, ate eta leiho hautsiak eta pazienteen sendagaiak eta espediente medikoak lurrean sakabanatuta aurkitu zituzten MSFko taldeek.

Bestalde, MSFko taldeek bisitatutako bost instalazio medikotik bat soldaduek okupatu dute. «Kasu batzuetan, okupazio hori aldi baterakoa baino ez da izan, eta beste instalazio batzuk gaur egun ere okupatuta daude. Mugulaten, Tigrayren ekialdean, soldadu eritrearrek oraindik ere osasun-zentroa erabiltzen dute base gisa. Abiy Addiko ospitalea ere (Tigray erdian milioi erdi pertsona hartzen ditu) indar etiopiarrek hartu zuten martxoaren hasiera arte», azaldu zuen GKEak.

75.000 etiopiar Sudanera

Gutxienez 75.000 etiopiar Sudanera joan dira Tigray probintziatik ihes egin ondoren. «Etiopiako Tigray probintziako baldintza txarrengandik ihes egiten duten errefuxiatu etiopiarren kopurua 75.000ra igo da joan den azarotik», adierazi zuen atzo Sudango Barne Ministerioaren menpeko Errefuxiatuentzako Batzordeak.

Amnesty International-ek, bestalde, «gizateriaren aurkako krimenak» salatu zituen; besteak beste, Eritreako indar militarrek Tigrayn ehunka zibil hil dituztela eta.