2021 API. 30 Pfizer eta Modernan ere tronbo gutxi batzuk erregistratu ditu EMAk GARA donostia Europako Medikamentu Agentziak (EMA) txertoekin lotura izan lezaketen 13 tronbosi kasuri buruzko txostenak jaso dituela jakinarazi zuen atzo; 11 Pfizer jaso ondoren erregistratutakoak dira, eta beste biak, Moderna hartu ondokoak. Oraingoz, ordea, EMAk ez du ikerketa espezifikorik abiatuko eta kasu berririk baden adi egongo da. Tronbozitopenia (plaketa gutxi odolean) ageri zuten hamahiru tronbosi kasuak Europako Ekonomia Esparruan (EEE) erregistratu dira. Pfizer-en kasuan, apirilaren 13ra arte, txertoaren 60 milioi dosi inguru eman dira EEEn, eta Modernarenak, 5 milioitik gora. EMAko iturriek zehaztu zutenez, «zenbait kasuren berri eman den arren», zifra horiek «oso txikiak dira eta ez dute kezkarik sortzen»; horregatik, ez dute beharrik ikusten bi txertoen eraginez tronboak garatzeko arriskuaren gaineko ikerketa espezifikorik hasteko. Dena den, EMA «hurbiletik monitorizatzen ari da» Pfizer eta Moderna txertoak erabili ondorengo kasuak, nahiz eta uste duen une honetan ez dagoela tronbo arriskuaren seinalerik. «Konparazio gisa, Vaxzevriarekin (AstraZenecaren izen komertziala), tronbozitopenia duten 142 tronbosi kasu jakinarazi ziren EEEn apirilaren 13ra arte, eta 17 milioi dosi baino gehiago eman ziren», zehaztu zuen. «EMAk eta EBko kide diren estatuek informazio berri oro monitorizatzen eta ebaluatzen jarraituko dute, covid-19aren txerto guztiekin zerikusia duten ustezko bigarren mailako ondorioei buruzko txostenak barne, eta neurriak hartuko dituzte osasun publikoa babesteko beharrezkoa denean», adierazi zuen agentziak.