Zero Zabor Bizkaia, Bilbao Night Maratoiaren aurka

Hilaren 23an Bilbao Night Maratoia ospatuko da berriro. Bizkai osoan parte-hartze handiena duen kirol ekitaldiak bere jarduera berreskuratuko du, covid-19aren ondorioz izandako geldialdiaren ondoren. Horrekin, aurreko edizioetako gainditze-espiritua, kiroltasuna eta jai-giroa berriro ikustea espero dugu. Baina gehien espero duguna zera da: ez daitezela errepikatu botila eta bilgarriz betetako kaleen irudi desatseginak, urtez urte ibilbidea betetzen dutenak. Izan ere, kirol erreferentea eta hiriaren irudia izanik, ezin dute onartu, ez antolakuntzak, ez erakundeek, zabor kopuru hori sortzea, ingurumenarekiko erantzunkidetasuna alde batera utzita.

Hori dela eta, arazo larri hori oraindik kontuan hartu ez bada, beste behin ere, ekitaldia hondakinen errekasto bihur ez dadin, neurriak hartzeko eskatzen dugu. Horretarako, edalontzi konpostagarriak eta biodegradagarriak erabiltzea eskatzen dugu, edo hondakinak sortzea saihesten duten «alga-malkoak» bezalako sistemak.

Era berean, birziklapen-gune selektiboak instalatzea eskatzen dugu, hornidura-guneen ondoren eta helmugan, atletek bertan utz ditzaten barratxo energetikoen, gel eta erabili eta botatzeko beste elementu batzuen bilgarriak.