Brebeta azterketa euskaraz egingo duten ikasleei frantsesez zuzenduko diete

Mobilizazio ugariek ez dute emaitzarik lortu. Brebeta frantsesez egin duten ikasleei soilik zuzenduko diete azterketa; euskarazkorik ez. Halere, Euskal Elkargoak lagunduta, zuzenketa ez-ofiziala eginen da.

Ipar Euskal Herriko kolegioetako azken urteko ikasleak brebeta egiten ari dira. Azterketa euskaraz egin ahal izateko mobilizazio ugari izan dira, baina Akademia Ikuskaritzak beti ezezkoa eman du. Hala ere, Seaskako ia ikasle guztiek zientzien ikasgaiko azterketa euskaraz egitea erabaki dute, nahiz eta frantsesez soilik zuzenduko den. Horren aurrean, zuzenketa ez-ofiziala eginen da Euskal Elkargoak utzitako espazioan.

Ikastolen Federazioko kolegioen aitzinean elkartu ziren atzo ikasle, irakasle eta gurasoak protesta egiteko, eta heldu den egunetarako hitzordu anitz aurreikusiak dira. Gaur, adibidez, azterketaren bukaerarekin bat eginez, Manex Erdozaintzi Etxart kolegioko ikasle eta gurasoak Donibane Garaziko Zitadela ikastetxean bilduko dira, 16.00etan.

Uztailaren 12an euskaraz zuzendutako zientzietako azterketen notak jakinaraziko dituzte, ofizialki frantsesez zuzenduak izan direnekin bat eginen ez dutenak.

Brebeta eta baxoa euskaraz egin ahal izatea aldarrikatzeko mobilizazio jendetsu ugari izan dira azkenaldian. Azkenak oihartzun eta eragin berezia izan du. Ikasle, irakasle eta gurasoek Baionako Akademia Ikuskaritza okupatu zuten. Polizia haien kontra oldartu zen, baina ez zuten eraikina utzi. Ekintza horren ondorioz, Euskal Elkargoak engaiamendua hartu zuen azterketaren zuzenketa bermatzeko.

Desobedientzia gisa, zenbait irakaslek brebeta zuzentzeari uko eginen diote.