Basurtuko medikuak, osasun publikoaren alde

Basurtuko ospitaleko bihotzeko kirurgia Gurutzetara eramateko erabakiak ekaitz politiko handia eragin du. Hasteko, epaitegi batek kautelaz geldiarazi zuen erabakiaren betearazpena. Eta atzo Basurtuko ospitaleko 38 zerbitzuburuetatik 36k gutun bat argitaratu zuten, Osasun Saila lekualdaketa justifikatzeko erabiltzen aritu den argudioei aurre egiteko. Ospitaleko ia arduradun mediko guztiek idazkia sinatzeak garrantzi berezia ematen dio. Ez da ohikoa iritzi daitezkeen gaietan horrelako adostasuna aurkitzea, eta horrek are gehiago azpimarratzen ditu idazkiaren balioa eta garrantzia. Lakuaren asmoak hain dira gardenak, ezen dagoeneko ez baitute inor nahasten.

Eskutitzean, medikuek puntuz puntu eztabaidatu dituzte Gotzone Sagardui Osasun sailburuak erabakia justifikatzeko erabili dituen argudioak. Lehenik eta behin esan dute nekez izan daitekeela luzaroan planifikatutako jarduera bat, duela bost urte eskas eraiki baitziren ebakuntza-gela berriak Basurtun, eta Iñigo Urkullu lehendakaria berak inauguratu zituen. Era berean, medikuek zalantzan jartzen dute emaitzak hobeak izatea unitate handiagoetan, batez ere Sailak beti uko egin diolako horri buruzko auditoria bat egiteari. Kirurgia kentzeak ospitalearen etorkizuna zalantzazkoa bihurtuko duela diote, eta, beraz, Bilboko ospitalea desegiteko maniobra bat dela ondorioztatu dute, eta beste urrats bat dela Osakidetza pribatizatzeko bidean. Ildo horretan, bilbotarrei eragiten dien gai batean Juan Mari Aburto Bilboko alkatearen isiltasuna nabarmendu dute; eta Manuel Lezartua Arartekoaren inplikazio falta ere salatu dute medikuek.

Lakuako Gobernuak neurri okerrak aplikatzeko eta osasun publikoaren arazo nagusia eta premiazkoena ez artatzeko duen itsukeria salatu dute sendagileek. Euren aburuz, profesionalen falta izango da gaur arte izan dugun osasun-arretaren eredua suntsituko duena. Medikuek proposatzen dituzten neurriak atzera botatzea «behar dugun herrialdearen» aurka joatea dela diote. Herritarren, sindikatuen eta osasungintzako profesionalen eskaera da Osakidetza publikoa mantentzea. Ulertzen erraza da.