2022 AZA. 20 EUSKAL DERBIA SAN MAMESEN Eguraldiak eskaini ez zuen giroa talde bietako zaleek jarri zuten Kalean eguerditik eta Xabi Solanok deituta San Mamesen zazpietatik, zaleek euskal futbolaren festa luzearekin gozatu zuten. Futbol-zelai txikiak jarri zituzten San Mames inguruan. (Aritz LOIOLA | FOKU) Amaia U. LASAGABASTER Futbola, euskara, musika, jokoak, jan-edana... eta euria. Hotza eta ura euskal futbolaren festara gerturatu ziren, baina eguraldiak eskaini ez zuen giroa zaleek jarri zuten. Klub bilbotarrak antolatutako Athletic Plazara ekimenak mota guztietako jardueraz betetako egitaraua eskaini zuen eguerditik aurrera eta bufanda zuri-gorri zein zuri-urdin, ahobizi zein belarriprest txaparekin, familian zein kuadrillan, adin guztietako lagunak aterkia hartu eta festan murgildu ziren, euriak utzi zuen neurrian. Partida hasteko ordua gerturatu ahala zelaiaren kanpoaldea betetzen joan zen eta zazpietatik aurrera, Xabi Solanoren eta Zigor DZren musikak San Mamesera sartzeko eta, bidez batez, euskaraz bizitzeko deia zabaldu zuen. Athleticen eta Realaren aldeko oihuek hartu zuten lekukoa baloia mugitzen hasi zenean. EUSKARALDIAArigune erraldoia bilakatu ziren San Mames eta bere inguruak, Euskaraldiarekin bat eginez futbola eta euskara batuz eta bultzatuz. Bufanda zuri-gorri eta zuri-urdinekin batera, ahobizi eta belarriprest txapak zaleen «uniformean» ezinbesteko osagarria izan ziren atzoko partidan.