2022 ABEN. 01 PILOTA Egutegiak uztartzeko, ezinbesteko aldaketak Pebeten Omenezkoa bihar hasiko da. (A. CANELLADA | FOKU) Jon ORMAZABAL Txapelketa ofizialen osagarri izateko asmoz sortu ziren pilota txapelketa pribatuak, hein handi batean ofizialetatik kanpo geratzen ziren pilotariek lehiatzen jarraitzeko aukera izan zezaten. Denborarekin, ordea, egoera, beharrak eta indar korrelazioak aldatu egin dira eta txapelketa pribatu batzuk ofizialak baino interesgarriagoak dira gaur egun pilotari eta pilotazale askorentzat. Ia herri guztiek dute euren txapelketa eta honek elkarbizitza arazoak sortu ditu bi lehiaketa moten artean, egutegia gehiegi estutzen baita udako sasoi batzuetan. Gabon buelta hau izaten da agendak gehien betetzen diren garai horietako bat eta Villabonako Behar Zana elkarteak arazo honen konponbideari begira hartutako erabakiak ikusgarritasuna eman dio aspalditik antzematen zen arazo bati. Bihar Antton Pebet zenaren omenezko txapelketaren hamargarren ekitaldiari ekingo diote, lau ostiraletan zehar afizionatu mailako pilotaririk onentsuenak batuko dituen txapelketa. Kartel erakargarri bat aurkezteaz gain, erabaki baten berri ere eman dute klubetik: hamargarren hau izango da data hauetan jokatuko den azkena. «2009an lehen edizioa antolatu zenean, txapelketa ofizialekin ez zuen apenas bat egiten eta txapelketa pribatuak ere gutxi ziren inguruan. Une honetan, ordea, txapelketa ofizialak eta pribatuak asko dira garai berean. Pilotariek partida asko dituzte eta saturazio hau ez da ona pilotarentzat», azaldu dute ohar batean. PEBETEN OMENEZKOA, UDAN Horren aurrean, udan Behar Zanak berak antolatzen duen Santio Txapelketarekin bat egingo du Antton Pebeten Omenezko honek, txapelketa askoz erakargarriago bati bide emanez. «Santio txapelketaren izaera ez da aldatuko. Elite mailako pilotariek ez ezik, klubei gonbidapenak egiten jarraituko dugu eta, horrela, txapelketaren azken fasera arte, txapelketa ‘onenetan’ jokatzen ari ez diren pilotari horiek jokatuko dute. Eta ondoren, pilotari hauek ‘onenen’ aurka jokatzeko aukera izango dute. Eta bertan, agian sorpresa asko ikusi ahalko ditugu; hau da, ‘onenekin’ jokatzeko aukera ez duten pilotari horiek partida hauek irabaziz gero, ‘onenekin’ batera jokatzeko gai direla erakutsiko dute», azaldu dio GARAri Behar Zanako kide Iñaki Lizasok. Horren aurretik, baina, aurten mimoz prestatu duten txapelketaz gozatzea dagokie Villabona eta inguruko pilotazaleei. Final-laurdenetako lehen bi kanporaketak bihar jokatuko dira; Landa-Elizegi/Elizalde-Oliden eta Urbieta II.a-E. Lizeaga/Azketa-Ugartemendia. Printzipioz, Murua-Alduntzin/E. Labaka-Erasun eta Arteaga II.a-Lizeaga eta Igoa-Aizpuruk osatuko dute lehen mailako parte hartzea duen lehiaketa.