2023 MAI. 20 EH Bilduren eta EAJren arteko lehia estua izango da Durangon Durangon 2019ko hauteskundetako emaitza EAJren (%35) eta EH Bilduren (%32) artean estua izan bazen, aurten hertsiagoa izatea espero da. Orduan, Herritarren Eskubidea eta Podemos alderdien hautagaitza bateratua erabakigarria izan zen EH Bilduri alkatetza emateko, baina baliteke aurten ez izatea. Trenaren lurperatzeak utzitako lursailerako plana izango da legegintzaldiko gakoa. Ima Garrastatxu, 2019an, Durangoko alkatetza lortu zuenean. (Monika DEL VALLE | FOKU) Asier ROBLES DURANGO 2012an hasitako trenbidearen lurperatze proiektuaren amaierak aukera leiho bat ireki du Durangon, eta Bizkaian garapen ahalmen handiena duen hirietako bat bihurtu du. Euskal Trenbide Sarea (ETS) erakunde publikoarenak diren 60.000 metro koadroko espazio liberatu horretan zer egin da orain gakoa. Gobernu taldeak (EH Bildu, Herriaren Eskubidea eta Podemos) 2021ean egindako herri galdeketak atzera bota zuen EAEko Gobernuak 18 altuerako bost dorre eraikitzeko proiektua. Gerora, Lakuako Lurralde Plangintza, Etxebizitza eta Garraio Sailak (PSEren eskuetan dagoenak) eta Durangoko Udal Gobernuak aurreakordioa lortu zuten trena lurperatzeagatik askatutako lursailetarako. Akordio horrek eremuaren eraikigarritasuna heren bat inguru murrizten du, espazio berdea irabazteko; eta alokairurako Babes Ofizialeko 240 etxebizitza garatzeko plan bat barnebiltzen du. Akordioaren ondoren, herritarrak asebetetzeko ideia berriak bilatzen ari dira orain. Jakina, hori ez da herritarren botoa mugituko duen faktore bakarra, baina alkate-tza lortzeak alderdientzat daukan garrantzia ulertzen laguntzen digu. Izan ere, bi gobernantza eredu kontrajarri ikus daitezke lursail horrekin zer egiteko erabaki politikoaren atzean. Mireia Elkoroiribek EAJko alkategai gisa errepikatuko du. Durangaldeko Mankomunitateko egungo lehendakaria da, eta lehenago, alderdi jeltzalearen eskutik, zenbait kargu publiko izan ditu, hala nola Eusko Trenbideak-en idazkaria, Euskal Trenbide Sarearen komunikazio arduraduna, Garraio Zuzendaria, Osasun sailburuaren kabineteko zuzendaria… EAJ ETA BEREIZMEN HANDIKO OSPITALEA «Esperientzia, gazteria, kudeaketa gaitasuna eta, batez ere, ilusioa eta Durangorekiko konpromisoa uztar-tzen» dituela nabarmendu du alderdi jeltzaleak. Sara Oceja eta Josune Escota zinegotziek ere zerrendan errepikatu dute. Nahiz eta 2019an indar bozkatuena izan (botoen %35 eta 8 zinegotzi) alkatetza galdu ondoren, EAJ emaitzak hobetzen saiatuko da aurten. Hala ere, beste indar batzuekin adostu beharko du, alkatetzara itzuli nahi badu. PSE da bere aukera nabarmena. Kanpainan bere proposamen nagusia trenaren lurperatzeak utzitako lursailetarako plan berezi batean zentratu da. Berrikuntza handi gisa, Bereizmen Handiko Osasun Zentro bat eraikitzea proposatu dute. Horrez gain, belaunaldien arteko parke publiko handi bat eta babes ofizialeko 111 etxebizitza (6 solairuko eraikina) eta merkatu libreko 443 etxebizitza (10 solairu eta atikodun 5 eraikin) proposatu ditu lursail horretan. EH BILDU: «ALTERNATIBA DAGOELA FROGATU DUGU» Ima Garrastatxu alkatea EH Bilduren hautagaitzaren buru izango da berriro, «duela lau urte Durangon hasitako aldaketa politikoa sendotzeko asmoarekin». Izan ere, 2019an botoen %32 eta 7 zinegotzi lortu zituen, eta Podemos eta Herriaren Eskubidea arteko koalizioaren babesarekin lortu zuen alkatetza. Horri eustea da indar subiranistaren helburua maiatzaren 28an, baita botoak irabaztea eta EAJ gainditzea ere. «Duela lau urte historia egin genuen, Durangoko lehen gobernu ezkertiarra bihurtu ginenean, jendearen beharretatik gero eta urrunago zegoen udal gobernu bat atzean utzita. Gobernu neoliberalen 40 urteren ostean, azken lau urteetan gauzak beste era batera egiten dakien alternatiba sendo bat dagoela frogatu dugu. Hala ere, oraindik proiektu asko ditugu aurrera begira», adierazi du Garrastatxuk, herritarren parte hartzearen garrantzia azpimarratuz. Izan ere, horixe izan da bere legegintzaldiko puntu nagusietako bat: 2021eko martxoan ‘Peri 1 Ferrocarril’ izeneko hirigintza proiektuaren etorkizuna erabakitzeko kontsulta aurrera eraman zuen. Kanpainan EH Bilduk salatu du EAJk baliorik gabe utzi nahi duela Udalak Lakuarekin lortu zuen akordioa. Horren aurrean, Garrastatxuk plan hori gauzatzeko eta garatzeko konpromisoa berretsi du, garrantzi handia emanez alokairurako Babes Ofizialeko 240 etxebizitzei, «beharrezkoa delako etxebizitzaren gaia jorratzea, alokairuen prezioak maximo historikoetan baitaude». Horrez gain, 34.000 metro koadroko -bost futbol zelaiko- parke berdea proposatzen du. ALKATETZA ERABAKIKO DUTEN ALDERDIAK Hainbat desadostasunen ondoren, Herriaren Eskubidea auzo plataformak eta Podemosek ez dute aurten hautagaitza bateratua errepikatuko. 2019an botoen %16 eta 4 zinegotzi lortu zituzten elkarrekin. Herriaren Eskubideak Jorge Varela aurkeztu du alkatetzarako hautagai gisa, Julian Riosen lekukoa hartuz. «Gainerakoek ez bezala, Durangoko beharrak Durangon erabakitzea defendatzen dugu, ez Gasteizen, ezta Madrilen ere», aldarrikatu du kanpainan Varelak, «hurbiltasunetik eta pertsonen parte hartzearekin lan egiten jarraitzeko» konpromisoa hartuz. Podemosek, berriz, David Hernandez aurkeztuko du alkategai gisa. Bere aurkezpenean, «justizia sozialaren alde lan egiteko, zerbitzu publikoak indartzeko eta ingurumenaren aldetik iraunkorra den hiri baten alde lan egiteko» konpromisoa hartu zuen. PSEk Jesica Ruiz aurkeztuko du berriro zerrendaburu. Abenduan egindako aurkezpenean, Aramotz auzoaren hiri-berroneratzea nabarmendu zuen. Izan ere, Udalak otsailean lizitatu zituen obrak, baina Ruizek nabarmendu nahi izan zuen obra horiek Europako funtsak lortu dituztela «Pedro Sanchezi esker». Haren alderdiak bi legegintzaldi daramatza 2 zinego- tzirekin, 2007an izan zituen 4 ordezkarietatik urrun. Aurten emaitzak hobetzen baditu, eta helburu horretan Podemos eta Herriaren Eskubidea taldeen arteko zatiketak lagun diezaioke, agian hurrengo legegin-tzaldiko alkatea nor izango den erabaki ahal izango du. PSEk azken urteetan Euskal Herriko beste erakunde publikoetan izan duen estrategiari jarraituz, seguruenik EAJri emango dio babesa. Hala ere, aipatu beharra dago azken legealdian Gobernu taldearekin abstentzioa hitzartu duela aurrekontuetan. PP Udalean ordezkaritza berreskuratzen saiatuko da. Euskal Herriko beste txokoetako joerari jarraituz, Durangon 2007an 3 zinegotzi eta 1.600 boto izatetik 2019an 700 botora jaitsi ziren, ordezkaritzarik lortu gabe. Ez dira garai onak eskuin espainolarentzat. Helburua lortu nahian, Carlos Garcia Bilboko eta Elorrioko zinegotzi ohia aurkeztu dute alkategai, eta Miguel Angel Rodriguezek, Isabel Diaz Ayusoren kabineteko zuzendariak, itxiko du zerrenda. Garcia ezaguna izango zaie askori. 2011n Elorrion, PPko zinegotzi bakarra izanda, alkatetza eman zion EAJri, nahiz eta EH Bildu bozka gehien lortu zuena izan. Orain, irudi hori Durangon errepika daiteke, itxura guztien arabera hauteskundeetako emaitza oso estua izango baita. PLAN BEREZIATrenbidea lurperatu ondoren, 60.000 metro koadroko lurzorua libre geratu da. Urteetako eztabaidaren ondoren, toki horretarako planak gai garrantzitsuenetako bat izaten segitzen du. ETORKIZUNA«Duela lau urte historia egin genuen, Durangoko lehen gobernu ezkertiarra bihurtu ginenean, jendearen beharretatik gero eta urrunago zegoen udal gobernu bat atzean utzita. Hala ere, oraindik proiektu asko ditugu», adierazi du EH Bilduko alkategaia den Ima Garrastatxuk.