2023 URR. 27 Fortuna Handien Zergarekin irabazi urriak aurreratu ditu Bizkaiak GARA BILBO Bizkaiko Aldundiak Fortuna Handien Elkartasunaren Aldi Baterako Zergari buruzko foru-arauaren proiektua onartu zuen, eta Batzar Nagusietan izapidetzen hasiko dira, urtea amaitu baino lehen onartzeko. Onartutakoa ondarearenaren osagarria denez, Gipuzkoan bezala, zerga horren bilketa 2 milioi euro ingurukoa izango da, 51 zergaduni dagokiena. Itxaso Berrojalbiz Ogasun eta Finantza diputatuak azaldu zuenez, «lurralde erkidean indarrean dagoen zergarako ezarritako konfigurazioa errepikatzen du», eta ondarearen gaineko zergaren «izaera zuzena, pertsonala eta osagarria» duen tributu bat da, pertsona fisikoen ondare garbia zergapetzen duena, 3 milioi eurotik gorakoa, eta urte bakoitzeko abenduaren 31n sortzen dena. Berrojalbizek zehaztu zuenez, «zerga progresiboa da, ondare handienei zerga tasa handiagoa ezartzen diena». Horrela, zerga oinarriaren % 1,5eko, % 1,75eko, % 2ko eta % 3,5eko kargak dituzten lau tarte ezartzen dira. Bestalde, ondarearen gaineko zergaren osagarria denez, zergadunek beren ondarearen gaineko zergaren kuota likidoaren zenbateko bereko kenkaria aplikatuko diote Fortuna Handien Elkartasunaren Aldi Baterako Zergaren kuota osoari. BI MILIOI EURO Diputatuak nabarmendu zuenez, Bizkaian, beste euskal lurraldeetan bezala, «ondarearen gaineko zergari hobaririk aplikatzen ez dioten autonomia erkidego guztietan gertatzen ari den gauza bera gertatuko da», eta Fortuna Handien Elkartasunaren Aldi Baterako Zergaren bidez bildutako dirua «ez da oso garrantzitsua izango bilketa osoaren esparruan», onartu zuen. Zehazki, Bizkaian, 2021eko Ondarearen gaineko Zergaren zergadunen datuak erreferentziatzat hartuta, Fortuna Handien gaineko Zergaren bilketa 2 milioi eurokoa izatea kalkulatzen da, 51 zergaduni dagokiena, «zerga berri horren kuota Ondarearen gaineko zergarengatik ordaindutako kuota baino handiagoa izango baitzaie». GUZTIRA, 90 MILIOIZERGADUN HANDI HORIEN DIRU BILKETA, GUZTIRA, 90 MILIOI EURO INGURUKOA IZANGO DA BIZKAIAN, ITXASO BERROJALBIZEK ZEHAZTU ZUENEZ. HAU DA, «ONDAREARI LOTUTAKO 86,5 MILIOIAK GEHI 2 MILIOI GEHIGARRI HORIEK 7.813 ZERGADUNENGAN IZANGO DUTE ERAGINA», ADIERAZI ZUEN BERROJALBIZEK.