Toquerok Ibarrolari: «Ideien unea da, ez pertsonalismoena»

Cristina Ibarrola Iruñeko alkate ohiak UPNko presidentetzarako hautagaia izango zela iragarri eta Alejandro Toquerori presidenteordetza eskaini ondoren, atzo Tuterako alkatearen erantzuna iritsi zen, «ideien unea» dela esanez, eta «ez pertsonalismoena».

«Gure alderdia norantz joatea nahi dugun sakon landu behar dugu», gaineratu zuen Toquerok. «Alderdian batasunaren eta adostasunaren alde egin dut beti; publikoki esan izan dut, baita alderdi barruko foroetan ere».

Ibarrolaren eskaintzak pozoi dosi bat zeukan. Alde batetik, Toquerori aurrea hartu zion, berak lidergoa hartuz eta bigarren maila batean utziz. Zerrendan bigarren mailan uzteaz gain, UPNren estatutuetan aurreikusten ez diren presidenteordetza berriak sortuko lirateke. Horretarako, alderdiaren estatutuak aldatu behar lirateke apirilaren 28an egingo den kongresuan.

Tuterako alkateak, UPNren esku dagoen kargu instituzional gorenak, Ibarrolarekin ez zuela hitz egin argitu zuen atzo. «Cristinak aurkezteko erabakia hartu du. Eskubide osoa du eta oso zilegi da. UPNko pertsona bakoitzak bere burua aurkez dezake, egoki baderitzo. Baina oraingoa ideien garaia dela ere esan behar dut, gure alderdia sakon aztertzeko unea da, norantz goazen ikusteko eta UPNk Nafarroaren zerbitzura zer egin dezakeen hobekien ikusteko»

Onda Cero Navarran egindako adierazpenetan Ibarrolak nabarmendu zuenez, ostiralean Toquerorekin hitz egin zuen hautagaitza bateratuan elkarrekin joateko aukerari buruz, nahiz eta Tuterako alkateak hori gezurtatu. «Hitz egiten jarraitu behar dugu, eta hautagaitza bateratua sortu, ahal dela», gaineratu zuen Iruñeko alkate ohiak, UPNrentzat onena litzatekeela azpimarratuz. Nolanahi ere, UPN «alderdi oso demokratikoa» dela eta edozein afiliatu aurkez daitekeela aipatu zuen. «Bi hautagai edo hiru badaude, ez da ezer gertatzen. Afiliatu bakoitzak bat aukeratuko du. Ez naiz inolako konfrontaziotan sartuko», adierazi zuen.