Ez da erabakigarria, baina lan sendoak abantaila ona eman dio Bera Berari Lisboan

Partida nola joan zen ikusita, nahi baino gol abantaila gutxiagorekin -zortzi aldekoa izan zen gehiena-, itzulerakoan lana biribildu beharko dute.

Super Amara Bera Beraren aurtengo helburu nagusia Europako multzoen fasean egotea da, eta atzo pauso bat eman zuen aurrera -nahi baino txikiagoa, partida nola joan zen ikusita-. Itzulerakoa datorren larunbatean izango da, Donostian (12.00etan), eta atzo lorturiko aldeak ona dirudi, nahiz eta inoiz ezin den esan erabakigarria dela.

Partida gogorra eta orekatua jokatu behar izan zuten donostiarrek Lisboan. Portugaldarrek ez zizkieten gauzak erraz jarri eta gogoz lan egin behar izan zuten. Eskerrak hortxe agertu ziren Lucia Prades, bere geldiketekin, eta Maitane Etxeberria eta Carmen Arroyo, beren golekin.

Azken hau ez zen urduri jarri bi penalti jarraian sartu zituenean -eta hori bere taldeak lehen hiruretan huts egin zuelarik-. Ez zuen tiro egiteko keinua egin eta bietan sartu zion gola atezainari. Gerora, partidako izarretako bat izan zen Arroyo, bederatzi golekin.

Lezoko hegalekoa, aldiz, bikain aritu zen kontraerasoan eta gol eder bat sartzeko aukera ere izan zuen, baselinaz. Hori bai, lehen zatian errusiar mendi baten antzera ibili ziren bi taldeak. Imanol Alvarezen jokalariak 0-2 aurreratu ziren, eta etxekoek hiruna berdintzea lortu zutenean, aurretik aritu ziren 6-6 arte.

Hortik aurrera, Bera Berak beste martxa bat ezarri nahi izan zion partidari, baina portugaldarrek ez zieten utzi markagailuan alde egiten eta 13-14 joan ziren atsedenaldira, Benficako Rodriguesek, denbora agortuta zegoenean, penaltiz sarturiko gol bati esker. Eta dena aldatu behar zen ondoren.

BIGARREN ZATIAN APURTU... ETA SUFRITU

3 minutu pasatxo behar izan zuten lehen gola egiteko. Benficak egin zuen, markagailuan berdinketa ezartzeko. Justu segituan Carmen Arroyok bere erakustaldiarekin jarraitu zuen 14-15ekoa jartzeko, baina penalti batek berriro utzi zuen berdinketa markagailuan (15-15). 17-18tik 17-23ra joan zen markagailua, ordura arteko partidako alderik handiena. Zortzi gol aldeko abantaila ere lortu zuten gipuzkoarrek (20-28), baina etxekoek kontraerasoa baliatu zuten aldeak murrizteko (26-29). Une kritikoa izan zen Bera Berarentzat. Eskerrak Arroyok bereak egiten jarraitu zuen (26-30).

Hala ere, azken unean Arroyok berak ezin izan zuen bere zortzigarren gola egin eta Benficak azken segundoan 28-30ekoa sartu zuen, portugaldarrei esperantza pizteko.