8.667 bonu, kultura Gipuzkoa osora hurbiltzeko

Gipuzkoako Aldundiak Kultura Bonua kanpainaren aldi berri bat abiatu du. Guztira, 8.667 bonu eskuragarri daude lurralde osoko 71 establezimendutan. Erraz ezagutzeko moduko bereizgarri bat izango dute, establezimenduan bertan kontsumitu ahal izateko.

Bonuak literatura, musika eta zinemarekin lotutako produktuak eskuratzeko (testuliburuak, ikasketetakoak edo profesionalak izan ezik) erabili ahal izango dira. Horietatik 2.666 euskarazko produktuetarako bakarrik erabili ahalko dira. Gainerako 6.001 bonuak beste hizkuntzetarako produktuak eskuratzeko erabiliko dira. Bonu horien bidez deskontuak izango dira hautatutako produktuetan: gehienez 12 euro, euskarazko produktuak erosteagatik, 20 eurotik gorako erosketa eginda; eta gehienez 8 euro, beste hizkuntzetako produktuak erosteagatik, 20 eurotik gorako erosketa eginda.

Kanpaina honen bidez Aldundiak kultura kontsumoa sustatu nahi du Gabonetan, eta urte osoan zehar zabalduko den dinamika positiboa sortu. Gainera, lurralde orekaren aldeko apustua egiten da, bonuak establezimendu bakoitzaren ezaugarrien arabera esleituz.

Aurkezpenean Goizane Alvarez Kultura sailburuak eskertu egin zuen parte hartu duten establezimenduen inplikazioa, eta nabarmendu zuen, horiei esker, kulturak gure bizitzetan lehentasunezko lekua izaten jarraitzen duela. «Kanpaina hau berriz ere arrakastatsua izango delakoan gaude, gipuzkoarrei eta kulturaren merkataritzari mesede eginez». Bonuak abenduaren 5etik 2025eko urtarrilaren 31ra arte erabili ahalko dira.