Gielo eta Freyren lesioa Surne Bilbao Basketen

Bilbao Basketeko erizaindegia jendez betetzen ari da. Xavi Rabaseda izan zen erortzen aurrenekoa, eta, hegaleko katalana osatu bada ere, talde bilbotarrean ez da giro. Kristian Kullamaek orkatilako arazo bati buelta eman ezinik jarraitzen du, eta eskolta estoniarrari Harald Frey eta Tomasz Gielo gehitu zaizkio, biek ezkerreko orkatila bihurrituta.

Berriz ere Europako txapelketek erasanda laga dute Bilbao Basketeko jokalari multzoa. Asteazkenean Le Portel taldearen aurka jokatu ostean min hartu baitzuten berdin Frey norvegiarrak nola Gielo poloniarrak ere. «Eboluzioaren arabera» erabakiko da zenbat denbora beharko duten kantxetara itzultzeko.

Lesioak beti dira garai txarrekoak, baina azken aldian Bilbao Basketek hiru garaipen kateatu ditu eta ACB Ligako azkenaurreko postutik hamaikagarrenera jauzi egin du, nahiz eta azken norgehiagokan Tenerifen galdu. 6-9 balantzearekin, Jaume Ponsarnauk zuzentzen duen taldea sailkapenean estutasunik gabe dabil uneotan.

Rabaseda eta Kullamae lesionatu zirenean hasi zuen bolada ona Bilbao Basketek. Esaterako, Ruben Dominguez eskoltak minutuak izan ditu eta jaurtitzaile fina dela erakutsi du, batik bat Coruñaren aurka zortzi hiruko sartuta. Amar Sylla Senegalgo hegal-pibotak ere minutu gehiago izan lezake.

Baina bilbotarren ligako hurrengo aurkariak ez dira badaezpadakoak: Unicaja Miribillan, bihar 18.00etan; eta Koparen bila Baskoniarekin lehian ari den Bartzelona, datorren igandean zortzi, Palau Blaugranan; tartean, Dinamo Sassari talde sardiniarra ahantzi gabe.

Ponsarnau entrenatzaileak «magia» egin beharko du, baliabide urriekin lehiakorra izateko. Bestalde, Omar Silverio Dominikar Errepublikako jokalariaren fitxaketa ere bizituko den itxaropena dago, nahiz eta orain arte lan bisa lortzeko arazoak izan dituen.

Saski Baskoniak, bestalde, Euroligako partida jokatuko du gaur gauean Virtus Boloniaren aurka 20.45ean. Taldeak hala baimenduta, Kamar Baldwinek ez du bidaiatu. Bai, aldiz, Markus Howardek, asteazkenean jokatu gabe geratu eta gero.