Juan Luis Agirre Letek askatasuna berreskuratu du, 28 urtez preso egon ondoren

Juan Luis Agirre Lete astigartarra aske geratu zen atzo. 28 urte eman ditu preso eta zigorra osorik agortu du. Auzitegi Nazional espainiarra haren kartzelaldia 2033ra arte luzatzen saiatu zen.

Juan Luis Agirre Lete espetxetik irten zen atzo, 28 urte preso igaro ondoren, zigorra osorik beteta.

Zaballako kartzelan zegoen 61 urteko astigartarra. Ordu bata eta erdiak jota berreskuratu zuen askatasuna, Etxeratek adierazi zuenez. Han zain zituen ama, beste zenbait senide eta lagunak.

Agirre Lete 1996an espetxeratu zuten. Auzitegi Nazional espainola haren kartzelaldia luzatzen saiatu zen 2013an, legeak ezartzen zituen onura batzuk ezabatuz. Gaur egun Barne ministro espainola den Fernando Grande-Marlaska zen erabaki hori hartu zuen tribunaleko burua.

Espetxealdia 2033ra arte luzatu behar zela erabaki zuen auzitegi bereziak, hasieran ezarrita zuena baino zortzi urte gehiago.

Agirre Letek erabaki honen kontrako helegitea aurkeztu zuen eta hiru urte geroago, 2016ko ekainean, Auzitegi Nazionala bera haren alde azaldu zen, eta espetxealdia 2025ean amaitu behar zela ebatzi zuen epaitegiak.

Hori da asteazken honetan bete duen zigorra, 28 urtekoa. 36 urte preso egotea zen Auzitegi Nazionalaren hasierako helburua.

ZIGOR KODEAREN ERABILERA

1995ean onartutako Zigor Kodea erabili nahi izan zuten epaitegiek horretarako, nahiz eta Agirre Leteri leporatzen zizkioten ekintzak urte hori baino lehenagokoak izan. Horrenbestez, 1973ko Zigor Kodeak izan behar zuen epaitzeko erabili beharreko araua.

Estrasburgoko Epaitegiak euskal preso politikoen espetxealdiak luzatzeko erabiltzen zuen “Parot doktrina” delakoaren kontra harturiko erabakia baino 19 egun lehenago hartu zuen Auzitegi Nazionalak Agirre Leteren zigorra luzatzeko erabakia. Zuerako espetxean zen orduan. Arau harengatik 60 presori zigorrak luzatu zizkieten.