Artzain Eskolaren jardueraren zabalpena herrialdeko eskaintza turistikoan sartzea aztertzen ari da Gipuzkoako Foru Aldundia

Artzain Eskolak burutzen duen jarduera «baliabide turistiko» gisa erabiltzeko aukera aztertzen ari da Gipuzkoako Foru Aldundia. Foru gobernuaren ustez, artzaintza tradizionalak dituen balioak eta praktikak herrialdearen erakusgarri «ona» izan daitezke.

Gipuzkoako Mugikortasuneko, Turismoko eta Lurralde Antolaketako Departamentua eta Oñatiko Artzain Eskola lankidetza-bideak aztertzen ari dira jardueraren inguruko zabalpena herrialdeko erakarpen turistikoen sarean sartzeko.

Azahara Dominguez Mugikortasuneko, Turismoko eta Lurralde Antolaketako foru diputatua Artzain Eskolaren Oñatiko instalazioan izan zen asteazkenan, bertan egiten den lana bertatik bertara ezagutzeko eta «Gipuzkoako baliabide turistiko berri bat bihurtzeko aukera aztertzeko».

Dominguezek adierazi duenez, «Artzain Eskola Gipuzkoa denaren erakusgarri ona da, munduari erakutsi nahi diogun esentzia horren isla». «Instalazio horiei esker, gure artzainek egiten duten lana bertatik bertara ezagutu dezakegu, bai eta lan horrek gure mendiak zaintzeko eta mantentzeko duen garrantzia ere, baita gure nortasunaren bereizgarri diren produktu horietako bat, Idiazabal gazta, garatzeko ere», nabarmendu du.

Balio erantsia

Dominguezek defendatu du «oso interesgarria» dela Artzain Eskola «beste elementu bat izatea Gipuzkoak dituen erakarpen turistikoen barruan»; izan ere, «elementu horrek balio erantsia ematen dio esperientzia turistikoari, eta ezin hobeto egokitzen zaio Mugikortasun, Turismo eta Lurralde Antolamendu Sailak bultzatzen dituen fluxu turistikoak desestazionalizatzeko eta deslokalizatzeko estrategiari».

Artzain Eskola, Aizkorriko parke naturalean kokatua, Gomiztegiko artzain eskola bat da, 1997tik lanbide tradizionalean aritu nahi duten gazteak trebatzen dituena.

Eskola honen jatorria XX. mendearen erdialdean dago, Arantzazuko anaia frantziskotarrek Gomiztegi baserria eta lur sailak erosi zituztenean, Santutegitik hiru kilometro eskasera. Hasieran abelburu gutxi zituzten arren, pixkanaka kopurua handituz joan zen, 90eko hamarkadan artalde bat sortu eta artisau gaztandegia egokitu zen arte.

1997az geroztik, urtero antolatzen da Artzain Eskola, artzain berriak prestatu eta trebatzeko eta artzain profesionalentzako ikastaroak egiteko. Ikastaro hori Haziren prestakuntza-eskaintzan sartzen da.