860 proiektutan ari dira lanean EAEko osasun ikertzaileak, batez ere minbizian eta neurologian zentratuta

EAEko osasun sistemak 858 ikerketa proiektu garatu ditu diagnostikoa eta tratamendua hobetzeko, onkologian eta neurologian zentratua, batez ere. Ikerketa instituen jarduera jasotzen duen 2023. urteko memoriaren arabera, 2.963 lagun aritzen dira osasun ikerketan.

EAEko osasun-sistemak osasun arloko 858 ikerketa proiektu lantzen ditu gaixotasunen diagnostikoa eta tratamendua hobetzeko, eta azterketa horietako lautik batek onkologia eta neurologia ditu ardatz.

BIO sareak 2023an garatutako I+G+Bko jardueraren urteko memorian jasotako datuak dira. Sare hori Osakidetzako lau osasun ikerketako institutuk osatzen dute: Bioarabak, Biobizkaiak, Biogipuzkoak eta Biosistemak.

Txostenak erakusten duenez, ikerketa horien %40k minbizia eta afekzio neurologikoak jorratzen dituzte, baina beste espezialitate batzuetako proiektuak ere garatzen ari dira, hala nola mikrobiologia eta gaixotasun infekziosoak, psikiatria, digestiboa eta gibeleko gaixotasunak, endokrinologia, arnasketa eta kardiobaskularra.

10etik ia 7, emakumeak

Gaur egun, 2.963 pertsona aritzen dira dira Araba, Bizkai eta Gipuzkoan, osasun ikerketetan, eta 10etik ia 7 emakumeak dira, «azken urteetan sendotzen den proportzioa», Lakuako Gobernuko Osasun Sailak ohar batean nabarmendu duenez.

Ikertzaile gehienak Osakidetzako (%73), osasun ikerketako institutuetako (%16) eta Euskal Herriko Unibertsitateko (%9) profesionalak dira.

Iaz, EAEko osasun ikerketako sistemak 877 azterketa klinikotan parte hartu zuen, 140 proiektutan parte hartu zuen hirugarren eragileekin lankidetzan, eta 1.699 argitalpen aipagarri sortu zituen.

Ezagutza hori produkzio ehunera egindako transferitzeari dagokionez, 63 proiektu garatu dira, 31 patente familiarekin.

Osasun ikerketako institutuek 37,98 milioi euro inbertitu zituzten iaz, eta diru horren erdia inguru osasun sistematik kanpoko finantzaketaren bidez lortu zen.

Alberto Martinez Lakuako Osasuneko sailburuak ikerketa lana nabarmendu du, aurrerapenak praktika klinikora eramateko aukera ematen duelako, eta hori onuragarria delako pazienteen osasunerako eta ongizaterako.

Ildo horretan, gogorarazi du ikerketek erakusten dutela ospitaleetako eta lehen mailako arretako ikerketa jardueraren gorakadak eragin zuzena duela pazienteen egonaldiaren murrizketan.