Irakurtzera animatzeko 70 jarduera baino gehiago antolatu ditu urritik abendura Gasteizko Udal Liburutegien Sareak

Adin guztietako publikoari zuzendutako programazioa aurkeztu du Gasteizko Udal Liburutegien Sareak gero eta erantzun handiago bat duen irakurzaletasuna hauspotzeko ekimenaren barruan. Abendura arte, formatu ezberdineko jarduera sorta prestatu dute, ‘Idazteaz beste’ edota ‘Irakurketa familia’ bezalako espazioak indartuz.

Gasteizko Udal Liburutegien Sareak irakurzaletasuna bultzatzeko jardueren programa berria antolatu du publiko guztiei zuzenduta. Hiriko 23 gizarte etxeetako biblioteketan 70 ekimen baino gehiago eskainiko dira urritik abendura bitartean, besteak beste liburu klubak, hitzaldiak, tailerrak, bakarrizketak, antzerkia edo ipuin kontaketak.

Sonia Diaz de Corcuera Gasteizko Udaleko Kultura eta Hezkuntza zinegotziak zehaztu duenez, 2023an 3.160 pertsona bertaratu ziren guztira; 2022an, aldiz, 3.033 izan ziren. «Azken finean, ekimen arrakastatsua da, bai kalitatearengatik, bai gasteiztarrengan sortzen duen erantzunagatik», gaineratu du.

Denboraldi berriko eskaintzan, ‘Irakurketa familian’ eta ‘Idazteaz beste’ jarduerak nabarmentzen dira. Lehenengoa Xabier Olasok dinamizatuko du, eta 8-9 urteko haurrei zuzendutako euskarazko irakurketa klub arrakastatsua da. Bertan, liburu, ipuin, abesti, poesia eta familiako jokoen bidez irakurzaletasuna sustatzen da. Hirugarren urte honetan Zabalganara itzuliko da.

‘Idazteaz beste’ jarduerak, berriz, euskal literaturarentzat espazio propioa izateko helburua du, euskarazko elkarrizketa informalen formatuan, literaturatik harago joateko eta publiko berrietara iristeko.

Euskal kulturaren inguruko izen handiekin itzuli da, eta urriaren 16an Ruper Ordorikaren txanda izango da, Lakuan, 19.00etan. Bere musika ibilbidea abiapuntu hartuta, letrei buruz hitz egingo du eta literaturarekin izan dituen harreman ugariak aztertuko ditu kantautore oñatiarrak.

Halaber, ‘Idazteaz beste’ ekimenaren baitan, azaroaren 6an, Garazi Arrula Ruizen (‘Gu orduko hauek’ eta ‘Lurraz beste’ ipuin liburuen egilea eta Txalapartako editorea) eta Iñigo Astizen (‘Monogamoak’ ipuin liburuaren egilea eta ‘Berria‘-n kazetaria) arteko solasaldia izango da Aldaben, 19.00etan. Saioaren helburua da euskal ipuingintzan murgiltzea eta gonbidatuen sorkuntza prozesuez, idazketaz eta, bereziki, ipuinez hitz egitea.

Era berean, Udal Liburutegien Sareak antolatu dituen beste jardueren artean daude ipuin kontalariak, kontzertuak, tailerrak eta antzerkia, besteak beste; gazte eta helduentzat, aldiz, gizarte intereseko gaiei buruzko hitzaldiak, tailerrak, mikroantzerkia, bakarrizketak, poesia errezitaldiak, kontzertuak eta liburuen aurkezpenak izango dira.

Liburuak trukatzeko azoka

Bestalde, Liburuak Trukatzeko XIV. Azoka egingo da urriaren 19an eta 20an Iradier Arenan, urriaren 24an ospatuko den Liburutegien Eguna dela eta. Nahi duenak gehienez bost liburu, komiki edo ipuin trukatu ahal izango ditu irakurri ez dituen beste batzuekin, bere etxeko liburutegia berritzeko. Bertaratzen direnek eramango dituztenez gain, Udal Liburutegien Sareak 5.000 liburu baino gehiago jarriko ditu trukerako.

Elkartrukeez gain, jarduerak, haurrentzako tailerrak, ikuskizunak, musika eta abar antolatu dira asteburu horretan: larunbatean 11.00etatik 14.00etara eta 17.30etik 20.30era, eta igandean goizeko ordutegian.

Azkenik, asteburu horretan eta Iradier Arenan bertan, Id-arte Euskadiko Arte eta Diseinuko Goi Eskolako ikasleek IX. Gazteentzako Nanoipuin Lehiaketan egindako kontakizun irabazleen eta ilustrazioen erakusketa egongo da ikusgai. Gasteizko Udal Liburutegien Sareak antolatu du lehiaketa, Laboral Kutxaren babesarekin.