Bizitzaren amaierako plangintza aurreratuari buruz informatzeko gida egingo du Arabako Foru Aldundiak

Arabako Batzar Nagusietan Elkarrekin taldeak eginiko proposamenari EAJk eta PSEk aurkeztutako zuzenketa jarraituz, bizitzaren amaierako plangintza aurreratuari buruzko gida egingo du Foru Aldundiak. Kontra azaldu da EH Bildu, gida bat baino «zainketa intentsiboetako zerbitzuak indartu eta bizkortzea» eskatuz.

Arabako Foru Aldundiak gida bat plazaratuko du «pertsonen balioak, lehentasunak eta nahiak errespetatzen direla bermatuko» duten erabaki eta zainketen aldez aurreko plangintzaren ezarpenari buruz», ingurune afektiboarekin eta zaintza-taldearekin lankidetzan, eta larritasun-egoeretan edo bizitzaren amaieran ematen den arretari buruz.

Arabako Batzar Nagusiek Foru Gobernuak (EAJk eta PSEk osatuta) aurkeztutako ordezkatzeko zuzenketa bat onartu dute, PP eta Elkarrekin alderdien abstentzioarekin eta EH Bilduren ezezkoarekin. Elkarrekin Arabaren jatorrizko proposamenari aurkeztu diote ordezkatzeko zuzenketa EAJk eta PSEk.

Adostutako ekimenak Diputazioari zuzendutako beste eskari bat dauka, arreta hori ematen duten profesionalei bizi-amaieraren arloko prestakuntzarekin jarraitzeko eta talde profesional horiek heriotza duinari buruzko aholkularitzan trebatzeko.

Zuriñe Rodriguez EAJko batzarkideak adierazi du «arlo honetako eskumenen %90 Eusko Jaurlaritzari» dagokiola, baina egoera larrietan edo bizitzaren amaieran dauden aurretiazko borondateen eta zainketen berri emateko gida bat egitearen alde agertu da, baita profesionalen prestakuntza sustatzearen alde ere.

Laura Fernandez Elkarrekin Arabako batzarkidearen esanetan, «oraindik asko falta da herritarrei bizitzaren amaieran dituzten eskubideen eta aukeren berri emateko», eta «pauso garrantzitsutzat» jo du «baliabideen eta zerbitzuen gida bat egitea».

EAEko eskubideen bermerako legea indartu eta «Zainketa Aringarrien Legea izateko beharra» planteatu du PPk.

Aitzitik, Xabier Ullibarri EH Bilduko batzarkidea ekimenaren aurka agertu da, «anbizio gutxikoa» dela iritzita. Dibulgazio kanpaina Lakuako Gobernuak egitea planteatu du, eta «zainketa intentsiboetako zerbitzuak indartu eta bizkortzea» ere, «aurretiazko borondateen dokumentuari buruz herritarrek duten ezagutza eskasiaren aurrean».