2021 EKA. 26 Ondarretako kartzelan, presoen zain Juantxo EGAÑA 1931ko apirilaren 14an, Errepublika aldarrikatu ondoren, Donostiako Udalean hautatutako zinegotzi berriek Gobernu Zibilera jo zuten Ondarretako espetxean zeuden preso politikoak askatzeko eskatzeko, hurrengo alkate izango zen Fernando Sasiain haien buruan zihoala. Bitartean, Donostiako erdialdean, presoak askatzeko eskatzen zuen manifestazio batek. Egun berean, gaueko hamarretan, askatu zituzten. Ehunka lagun zeuden kanpoan haien zain, eta prentsak hurrengo egunean azaldu zuenez, «(...) espetxeko ateak zeharkatzeko unea zirraragarria izan zen benetan. Askatuak berotasun handiz estutu zituzten (...) Segizioa Donostia aldera etorri zen, biba eta txalo artean». Garibai kaleko errepublikanoen zentrora iritsi zirenean, balkoi batetik, askatu berriek zentroaren kanpoaldean zeuden ehunka lagunei hitz egin zieten beren askatasuna eskertzeko. Ekitaldian Clara Campoamorrek ere parte hartu zuen. Ricardo Martinen argazkian Donostiako herritar talde bat ageri da Ondarretako espetxearen kanpoaldean presoak askatzeko zain; haien artean presoen emazte batzuk ere ageri dira.