Nafarroa Bizirik herri ekimenak erakunde publikoek izandako jarrera txarretsi du

1512-2012 Nafarroa Bizirik ekimeneko kideek Nafarroako konkistaren irakurketan instituzio publikoek izan duten jarrera salatu eta konkistaren inguruko eztabaida aldarrikatu dute.

Nafarroako konkistaren 500. urteurrena gogoratzeko sortu zen 1512-2012 Nafarroa Bizirik herri ekimeneko kideek erakunde publikoek konkistaren inguruan izan duten jarrera salatu dute. Gaur eman duten prentsaurrekoan, konkistaren harira instituzio publikoek egiten duten irakurketaz bestelako gogoeta bat aldarrikatu dute.

«Oztopo eta zailtasunak gaindituz» eremu ezberdinetako nafar askorengana heltzea lortu dutela aipatu dute eta aurrera eramandako ekimenen bidez «nafar askok iraganera begiratzeko izan duen beldurra galdu du».

Ekimenaren helburu nagusia konkistaren inguruko eztabaida publikoa sustatzea dela azaldu dute. Konkista «berdinen arteko hitzarmena» izan zela dioen interpretazioa ukatu eta gertakariaren ostean Nafarroak garai «gogorra» bizi izan zuela gogoratu dute.

Kongresu espainolaren aldetik jaso zuten tratua gaitzesteko baliatu dute arlo desberdin askotako lagunen presentzia izan duen prentsaurrekoa.

Hilaren 16an ospatuko den Nafarroa Bizirik egunean parte hartzeko deia ere egin dute.