Mikel Egibarren senideek «egonkor baina larri» jarraitzen dutela ohartarazi du Etxeratek

Mikel Egibar preso politikoaren senideek ospitaleratuta jarraitzen dute eta haien egoera egonkorra dela adierazi du Etxeratek. Alabak Miguel Servet Ospitalean jarraitzen du, eta bikotea eta semea Ospital Klinikoan daude.

Mikel Egibar preso zizurkildarraren senideek istripu larria izan zuten asteartean, Zuerako espetxetik Euskal Herrira itzultzen ari zirela.

Emaztea eta bi seme-alabak Zaragozako erietxe ezberdinetan ospitaleratu zituzten eta egungo egoera «egonkorra baino larria» dela adiearzi du Etxeratek ohar bidez.

12 urteko alabaren egoeraren inguruan, hasiera batean lesio larririk ez zuela uste zen arren, bosgarren ornoa zanpatua eta lekuz mugitua duela jakinarazi du elkarteak. Dagozkion zaintzak jaso ahal izateko Muigel Servet Ospitalean jarraitzen badu ere, datozen egunetan Euskal Herriko erietxe batera ekarriko dute haurra, zaintzak Euskal Herrian bertan jaso ahal izateko.

Hamalau urteko semeak humeroa hautsita du, eta ebakuntza egin behar diote; baina, bera ere Euskal Herriko erietxe batera ekarriko dutela eta ebakuntza bertan egingo diotela nabarmendu du.

Bikotea da egoera larrienean aurkitzen dena. Sedatuta jarraitzen du, eta ebakuntza egin behar diote. Berak Zaragozako Ospitalean jarraitu beharko du ospitaleratua, Etxeraten arabera.