Itun Antinterrorista bertan behera uzteko eskatu du ELA sindikatuak

Sindikatuaren arabera, Itun Antiterroristak «babes ideolojiko, judizial, politiko eta morala ematen dio errepresio dinamika anker honi» eta Donostiako gazteen kasuan Auzitegi Gorenak hartutako erabakia errefusatu du.

ELAk Auzitegi Goren espainolak Donostiako gazteen aurka hartutako erabakia salatu du ohar bidez. «Irregulartasunez betetako prozesua» izan dela iritzi dio, «PP-PSOEk eta frantziar eta espainiar konfederazio sindikalek sinaturiko Itun Antiterroristatik eratorritako bultzatada politiko errepresiboan oinarritutakoa».

Bere iritziz, Itun horren xedea «erreferentzia independentista ezabatzea eta egungo prozesu politikoa baldintzatzea» da baita atxiloketa, sarekada eta kartzelaratzeekin «mugimendu politiko oso baten kikiltzea eta gazte hauek militantziarekiko desafekzioa eta militantzia bera uztea».

Ildo horretatik, Itun Antiterrorista bertan behera uzteko eskatu du ELA sindikatuak, «babes ideolojiko, judizial, politiko eta morala ematen diolako errepresio dinamika anker honi».

Halaber, «proiektu politiko baten alde militatzearen eskubidea bermatua» izateko galdegin du, «inongo jazarpenik gabe».