Ekaitz de Iberok, Martuteneko espetxetik, eskertza mezua luzatu du jasotako babesagatik
Gazte donostiarra atxilo eraman duten leku berean, Donostiako Bulebarrean, elkarretaratzea egin dute bere askatasuna galdegin eta Auzitegi Gorenak zigortutako gazteei babesa adierazteko.
Arratsaldeko 19.30ean abiatu da elkarretaratzea Bulebarreko Aske Gunean. Jendetza bildu da Ekaitz de Ibero gaztearen askatasuna galdegiteko. Haien artean, Auzitegi Gorenak zigortutako gazte auzipetuak. Haiek izan dira elkarretaratzearen buru, goizean Ertzaintza gogor oldartu den leku berean.
Atxilo eraman du Polizia autonomikoak. Eta handik Martuteneko espetxera. Bere telefono deia jaso dute elkarretaratzean eta gazte donostiarrak eskertza mezua luzatu die azken egunetan eta azken hilabeteeetan babesa adierazi dieten lagunei. Guztiek etxean behar dutela aldarrikatu du.
Ordu erdiren buruan, txalo artean amaitu da elkarretaratzea. Ondoren, bertan bildutako jendetza auzipetuen inguruan eseri da, haien babesa adierazte aldera.
Mobilizazioa amaituta, giza zutabeak antolatu dituzte auzipetuei beren etxeetara laguntzeko.