Herriraren aldeko dinamika Ipar Euskal Herrira zabaldu nahi dute

Guardia Zibilak Herriraren aurkako sarekadaren ondotik lehen agerraldia egin du mugimenduak, Baionan, eta adierazi du ez duela baztertzen operazioa Ipar Euskal Herrira zabaltzea. Hori dela-eta, «Tantaz tanta» dinamika ere iparraldeko hiru herrialdeetara ere eraman nahi dute.

Astelehenean Estatu espainiarrean Herriraren kontra burutu zen sarekadari erantzunez herri mugimenduak agerraldia egin du Baionan.

Bertan Herrirako ordezkari diren Emili Martin eta Garbiñe Erasok hitza hartu dute astelehenean abiatu zen operazioa Ipar Euskal Herrira zabaltzea ez dutela baztertzen adierazteko.

Asteartean Bilbon manifestazioa deitzeko egin zen agerraldiaren garrantzia azpimarratu dute eta Ipar Euskal Herrira ere zabaldu nahi dutela jakinarazi dute Baionan.

Horretarako asteartean bertako eragileekin bilduko dira «Tantaz tanta» Herriraren aldeko mugimendua zabaltzeko iparraldeko hiru lurraldetara ere.

Bide horretan, Parisko Gobernuari eta PSri dei egin diete, eraso honen aurrean erreakzionatu dezaten.

Christiane Taubira Justizia ministroa zuzenean interpelatu dute, Herriaren kontrako operazioa gauzatzen ari zen bitartean Alberto Ruiz-Gallardonekin «terrorismoaren aurkako borrokan» elkarlana indartzea sinatzen ari zela gogoratu du eta horren ordez bake prozesuaren aldeko pausuak eman ditzala galdegin diote.

Aldi berean, euskal preso eta iheslarien eskubideen defentsan beti gardentasunez lan egin izana nabarmendu dute Herrirako ordezkariek.