Pilota munduaren babesa jaso du 35/02 sumarioan auzipetutako Mikel Arregik

Mikel Arregi Gipuzkoako Euskal Pilota Federazioko presidenteak babes zabala jaso du pilotaren eremu desberdinetako lagunengandik. HB, EH eta Batasunaren aurkako makrosumarioaren baitan Madrilgo Auzitegi Nazionalean epaitzen ari diren 36 lagunetako bat da ‘Ertxin’.

Donostian eginiko agerraldi batean, pilota munduko aurpegi ezagun ugarik elkartasuna adierazi dio Gipuzkoako Euskal Pilota Federazioko presidente den Mikel Arregiri.

Arregi bera ere egon da agerraldian, eta han izan dira kazetariak, pilotariak, elkarteak, presidenteak, epaileak eta oro har pilota maite dutenak.

Horien guztien izenean, Xabier Euzkitze kazetariak agiri bat irakurri du, zeinetan adierazten den Madrilen epaitzen ari diren bi makrosumarioek «Euskal Herriaren aniztasunari zuzen-zuzenean eraso» egiten diotela.

Era berean, bat egin dute iragan uztailaren 8an euskal jendartearen zenbait arlotako profesionek egindako ekarpenean jasotzen diren bost puntuekin: «Ez dezatela gehiago epaiketa politikorik egin; eskandaluzko instrukzio bidegabeetan oinarritutako epaiketa guztiak artxibatu ditzatela; prozedura judizial guztietatik etsaiaren zigor zuzenbidearen aplikazioa desager dadila; aniztasun politikoa eta elkartze, adierazpen zein askatasun politikorako funtsezko eskubideak baldintzarik gabe errespeta daitezela; eta elkarbizitza demokratikorako oinarri sendoak ezartzeko aldarria egin nahi dugu».