Nazioarteko Egiaztatze Batzordea Euskal Herrian da

Ram Manikkalingam buru duen Nazioarteko Egiaztatze Batzordea Euskal Herrian da. Arratsaldeko lehen orduan iritsi dira hegazkinez Loiuko aireportura eta Iñigo Urkullu lehendakariarekin gaur bertan batzar daitezke.

Ram Manikkalingam buru duen Nazioarteko Egiaztatze Batzordea Euskal Herrian da dagoeneko. 13.45ean iritsi dira Loiuko aireportura hegazkinez eta uko egin diote hedabideen aurrean adierazpenak egiteari.

Datozen orduetan Euskal Herriko eragile politiko eta sozialekin bilkurak egingo dituzte iragarri dute hainbat komunikabidek. Efe albiste agentziaren arabera, gaur arratsaldean bertan dira batzartzekoak Iñigo Urkullu lehendakariarekin. Beste hedabide batzuk, ordea, bilkura bihar goizean izan daitekeela diote.

Bihar arratsaldeko 14.00etarako deitu du Nazioarteko Egiaztatze Batzordeak prentsaurrekoa Bilboko hotel batean eta azken egunean zabaldutako zurrumurruen arabera, ETAren balizko armagabetzearen berri eman dezakete.

Agerraldiaren ondoren, euskal alderdi politiko eta eragile sozialekin bilkurak burutuko ditu Batzordeak.

Manikkalingamekin batera, Nazioarteko Egiaztatze Batzordeko kide dira Ronnie Kasrils (Hegoafrika), Chris Maccabe (Britainia Handia), Satish Nambiar (India), Fleur Ravensbergen (Herbehereak) eta Aracelly Santana (Ecuador).