AHTren aurkako bizikleta martxa egingo du Mugituk uztailaren 25etik abuztuaren 2ra Bizkaian

Abiadura Handiko Trenaren (AHT) aurkako II. Bizikleta Martxa antolatu du Mugitu! mugimenduak uztailaren 25etik abuztuaren 2ra, Bizkaian barrena.

Mugitu! mugimenduak AHTren aurkako II. Bizikleta Martxa «desobedientea» antolatu du uztailaren 25etik abuztuaren 2ra, ‘Herririk herri, txikizioaren aurka mugi!’ lelopean. Aurten Bizkaiko hainbat herri eta eskualdetan ibiliko dira. Hala, Durangaldean hasiko eta Arratia, Txorierri, Urdaibai, Uribe Kosta, Ezkerraldea, Enkarterriak eta Hego-Uribe zeharkatu ondoren, Bilbon bukatuko da martxa.

Martxa honen bidez AHTren aurkako aldarria zabaldu nahi du Mugitu! mugimenduak. Azpiegitura horrek zuzenean kaltetzen dituen pertsonekin elkartuko dira, baita «herrien eta auzoen hondamendiaren aurka erresistitzen duten bizilagun eta taldeekin», eta lurraren defentsan nahiz berreskurapenaren alde borrokan ari diren taldeekin.