«Desobedientzia» delitua egozten diete Loiolako herri harresian atxilotutako bi lagunei

Loiolako herri harresian parte hartzen ari zirela atxilotu zituzten bi lagunei agintearen kontrako «atentatua» leporatu zieten hasiera batean, baina akusazio hori erretiratu egin du Ertzaintzak. «Atxiloketa aurretik ez genuen inolako kontaktu fisikorik izan ertzainekin», azpimarratu dute.

Oihartzun handia izan zuen atzo Loiolako herri harresian ertzain bat zauritu izanak eta horren erantzule gisa bi lagun atxilotu izanak.

Beñat Hach Embarek ormaiztegiarra eta Esteban Orbegozo izan ziren atxilotutakoak eta jazotakoaren berri eman dute biek Infozazpi Irratiari eskainitako elkarrizketa banatan.

Azaldu dutenez, Loiolako santutegiaren eskaileretan osatutako harresian «adreilutxo» bat baino ez ziren. Zeuden tokitik, beherago zegoen ertzain bat minez ikusi zuten, erori egin zelako.

Ertzaintzaren buruetako batek berehala eman zuen Hach Embarek eta Orbegozo atxilotzeko agindua, «desobedientzia eta atentatu» delituak egotzita.

Hala ere, irudiak berriz aztertu ondoren eta jada polizia-etxean zeudela, jakinarazi zieten «atentatua» egin izanaren akusazioa erretiratu zietela.