Gabonetako oparia jaso du Realak
Jordi Albak, partidako lehen minutuan, bere atean egindako gol bati esker hiru puntuak lortu ditu Realak (1-0). [Partidaren xehetasunak]
NAIZ
Realak garaipen garrantzitsua lortu du Bartzelonaren aurka Anoetan (1-0). Partida erabaki duen jokaldia lehen minutuan iritsi da, Jordi Albak bere atean gola egin ostean.
Luis Enriquek aulkian utzi ditu Messi eta Neymar eta garesti ordaindu du. Bartzelonak baloiaren jabetza izan du norgehiagoka osoan zehar, baina oso aukera gutxi sortu ditu. Bigarren zatian zelairatu dira argentinarra eta brasildarra. Hala ere, Realak emaitza oso ondo eusten asmatu du. Rulli atezainak eta Iñigo Martinez atzelariak bikain gidatu dute taldea.