Ezker Abertzale «berri» bat «euskal errepublika askea» eraikitzeko

Abian prozesuaren azken batzarra burutu du Ezker Abertzaleak Durangoko Landako gunean eta «indarberriturik» atera dela barne eztabaidaren ostean nabarmendu dute.

Ehunka lagun bildu dira gaur goizean Durangoko Landako gunean Abian prozesuari amaiera eman dion azken eztabaidan. Ezker Abertzaleko ordezkari andanek parte hartu dute bi orduz luzatu den eztabaidan eta Marije Fullaondo eta Igor Arroyok adierazpenak egin dituzte ondoren.

Nabarmendu dutenez, «Ezker Abertzale berri bat, indarberriturik» aterako da Landakotik eta «euskal errepublika askea eraikitzea» izango du xede. «Erresistentziarako» garaia amaitu dela esan dute Fullaondok eta Arroyok. «Orain arte eutsi egin dugu, zutik, baina orain abian hartzeko unea da», azpimarratu dute.

Ildo horretan, Ezker Abertzalearen egitasmo estrategikoak «inoiz baino gaurkotasun gehiago» duela esan dute eta beren «konpromiso historikoari» eusten diola «mundu berri abten alde eta herri honen askatasunaren alde».

Independentzia gauzatzeko estrategia «eraldatzaile» baten aldeko apustua egingo dutela azaldu dute eta bide horretan, preso eta iheslariak etxera ekartzea beharrezkoa dela aldarrikatu dute.

«Ezker Abertzalearen birfundazioa izango da», azpimarratu dute.

Ekitaldia ‘Internazionala’ eta ‘Eusko gudariak’ abestuz amaitu da.