Iago Herrerinek Leganesen jokatuko du denboraldia amaitu arte, Athleticek utzita
Athleticek eta Leganesek akordioa lortu dute, Iago Herrerin atezain zuri-gorriak denboraldia bukatu bitartean talde madrildarrean utzita jokatu dezan.
NAIZ
BILBO
Ohar banatan Athleticek eta Leganesek jakinarazi dutenez, Iago Herrerin atezaina talde madrildarrean arituko da denboraldia amaitu arte.
Herrerinek berehala hasi beharko du Leganesekin lanean, talde madrildarreko atezaina den Jon Ander Serantesek lesio larria izan baitu. Lotailu gurutzatuaren hausturaren ondorioz denboraldi osoa galduko du barakaldarrak.
Larunbatean bertan Vila-realen aurkako partidan egin lezake debuta Herrerinek.
Athleticen harrobian hazi ondoren, 56 aldiz izan da lehen taldearen atezaina lehiaketa desberdinetako partida ofizialetan.