Gatazkaren ondorioak behin betiko gainditzeko akordioak gauzatzeko unea dela adierazi du EH Baik

Euskal Herrian azkeneko hamarkadetan alde anitzeko sufrimenduak izan direla gogoratu ondoren horiek guztiak aitortzea ezinbestekoa dela adierazi du EH Baik, «zauriak sendabidean ezarri eta euskal jendartea berradiskidetzeko». Era berean, «gatazka armatuaren iturburuan aurkitzen diren sugarrak behin betiko itzaltzea» ezinbestekoa izanen dela uste du, gertatukoari buruz gogoeta integrala egiteko. Koalizioaren hamabost bat ordezkari izan dira ETAren amaieraren eta Arnagako Adierazpenaren testuinguruan Baionan antolaturiko agerraldi berezian. 

Anita Lopepek eta Peio Etxeberri-Aintzartek irakurri dute, lehenak euskaraz eta bigarrenak frantsesez, azken egunetan izandako gertakari politiko bereziei buruz EH Baik eginiko gogoeta.

Agiri horretan, adierazi du EH Baik hamarkada batzuk lehenago Iparretarrak eta orain ETAk aldebakartasunetik indargabetu dituztela bere «adierazpen bortitzak». Gatazka ez zela bi erakunde horien ibilbideekin hasi eta, ondorioz, ez dela beraien desagerpenarekin bukatuko nabarmendu eta gero, gaur gaurkoz estatuen egiturazko bortizkeriak bere baitan jarraitzen duela oroitarazi du koalizioak, orain arte «alde guztien artean aterabide adosturik lortu izana» deitoratuz.

Haatik, «gatazkaren ondorio guztiak behin betiko gainditzeko» akordioak erdiesteko aukera zabalik dagoela, are gehiago ETA desagertu ondoren, uste du EH Baik, eta «aukera berri hau galtzen ez uzteko» ahaleginak eginen dituela azaldu du bere adierazpenean.

Izan ere, zauriak sendatzeko eta berradiskidetzea eraikitzeko bidean, premiazko ikusten du «alde anitzeko sufrimenduak aitortzea», biktima guztiek «justizia eta erreparazioa behar» dituztelako.

Era berean, gertakariak ezin direla «begi bakarrez» aztertu oharrarazi du koalizioak, «gatazka adierazpen bortitzak, ondorioak, gertatutakoa eta zergatiak» bere baitan jasoko duen gogoeta integrala egiteko premia azpimarratuz.

«Etorkizunean errepikapenik gerta ez dadin, gatazka armatuaren iturburuan aurkitzen diren sugarrak behin betirako itzaltzea ezinbestekoa» izanen dela uste du EH Baik.

Urte hasieratik Parisek «urrats epelak» eman baditu ere hainbat presoen hurbilketarekin, behin ETA desagertuta «preso eta iheslari guztiak etxeratzeko bidea» irekitzeko ordua dela nabarmendu du koalizioak.

Abagune berriak itxaropenaz hartzen du EH Baik, «gatazka politikoari behin betirako aterabide demokratikoa bat eraikitzeko baldintza berriak irekitzen dituelako».

Elkarbizitza demokratikoaren aldeko hautua eginez, adierazi du aurrera begira bere helburua «aukera politiko guztiak, independentziarena barne», gauzatzea aintzat hartuko duen aterabidea sustatzea izanen dela.